Ձեր վստահելի աղբյուրը

Հայ գրոսմայստեր, օլիմպիական չեմպիոն Լևոն Արոնյանը «Կորուս Չեսս 2008» սուպերառաջնության 9-րդ փուլից հետո նորից գլխավորում է ուժեղագույնների մրցաշարային աղյուսակը: Մեր շախմատիստը իր հաշվում ունի 5,5 միավոր և նորվեգացի Մագնուս Կարլսենի հետ կիսում է առաջին հորիզոնականը: 9-րդ տուրում Արոնյանը իր ուժերը չափեց ուկրաինացի Էլյանովի հետ: Այս մրցավեճը խաղաղ ավարտ ունեցավ:

Կարլսենը այս առաջնությունում իր առաջին պարտությունը կրեց Պետեր Լեկոյի հետ խաղում: Աշխարհի չեմպիոն ռուսաստանցի Վլադիմիր Կրամնիկը այս տուրում զիջեց Վեսելին Տոպալովին: Այսպիսով առաջին և երկրորդ հորիզոնականներում են համապատասխանաբար Արոնյանը և Կարլսենը: Երրորդ հորիզոնականում է 5 միավորով Կրամնիկը: Նույնքան միավոր ունեն ադրբեջանցի Ռաջաբովը, աշխարհի գավաթակիր, հնդիկ Անանդը և անգլիացի Ադամսը, որն այս փուլում առավելության հասավ Հոլանդիան ներկայացնող Վան Վելլի նկատմամբ: 10-րդ տուրում Արոնյանը իր ուժերը կչափի Ադամսի հետ:

«Բ» խմբում մրցաշարային աղյուսակը միանձնյա գլխավորում է հայ գրոսմայստեր Սերգեյ Մովսիսյանը: Նա իր հաշվում ունի 6,5 միավոր: 6 գործակցով երկրորդ հորիզոնականում է ֆրանսիացի Էթիեն Բակրոն: Լավագույն եռյակը 5,5 միավորով եզրափակում է անգլիացի Նիգել Շորթը: Մյուս հայ գրոսմայստեր Գաբրիել Սարգսյանը, ցավոք չի հաջողում, նա իր հաշվում ունի 3 միավոր և զբաղեցնում է 13-րդ տեղը: Հիշեցնենք, որ Լ. Արոնյանն «Կորուս Չեսս 2008» շախմատի աշխարհի ուժեղագույնների սուպերառաջնության գործող չեմպիոնն է: Նա միակն էր, որ ողջ մրցապայքարի ընթացքում ոչ մի պարտություն չկրեց: Նրան հաջորդում էին ադրբեջանցի Ռաջաբովը, Բուլղարիան ներկայացնող Տոպալովը և շախմատի աշխարհի չեմպիոն ռուսաստանցի Կրամնիկը: Նշենք, որ մրցաշարի մասնակիցներից ամենաշատը` 5 անգամ, չեմպիոնի կոչումը նվաճել է հնդիկ շախմատիստ Վիշվանաթան Անանդը, Տոպալովը` 2, Գելֆանդը, Արոնյանը և Կրամնիկը 1-ական անգամ:

Ի դեպ, «Կորուս Չեսս» առաջնությունն անընդմեջ անցկացվել է 1938 թվականից, սակայն այն մինչև 2002 թվականը կոչվել է «Հոգովենտուր»: Այս մրցաշարին մասնակցում են աշխարհի ամենաբարձր վարկանիշ ունեցող շախմատիստները:

«Կորուս Չեսս 2008»-ը մեկնարկել է հունվարի 12-ին և կշարունակվի մինչ այս ամսվա 27-ը: Այն անցկացվում է Հոլանդիայի Վեյկ-ան-Զեե քաղաքում: