Ձեր վստահելի աղբյուրը

Լևոն Արոնյանը «Կորուս Չեսս 2008» սուպերմրցաշարի չեմպիոն է:
Հայ գրոսմայստերն այս տիտղոսը նվաճեց երկրորդ անգամ անընդմեջ: Արոնյանը, մրցաշարի արդյունքում վաստակած 8 միավորով, մրցաշարային աղյուսակում առաջին տեղը կիսել է նորվեգացի գրոսմայստեր Մագնուս Կարլսենի հետ:
Վերջին` 13-րդ տուրում մեր շախմատիստը ոչ ոքի է խաղացել Հունգարիան ներկայացնող Հուդիտ Պոլգարի հետ, իսկ դրանից առաջ` 12-րդ տուրում, կրկին խաղաղ արդյունքով էր ավարտել հանդիպումը ուկրաինացի Վասիլի Իվանչուկի հետ:
Մագնուս Կարլսենը վերջին տուրում ոչ ոքի է խաղացել ադրբեջանցի Թեյմուր Ռաջաբովի հետ, իսկ 12-րդ տուրում առավելության է հասել աշխարհի չեմպիոն Վլադիմիր Կրամնիկի նկատմամբ:
3-րդ հորիզոնականը 7.5-ական միավորով կիսել են աշխարհի գավաթակիր, հնդիկ Վիշվանաթան Անանդը և Ադրբեջանը ներկայացնող Թեյմուր Ռաջաբովը: 5-6-րդ հորիզոնականները 7-ական միավորով կիսում են Իվանչուկն ու Լեկոն: Կրամնիկը 6.5 միավորով միայն 7-րդն է:

Ամփոփելով մրցաշարի ընդհանուր պատկերը` կարող ենք նշել, որ Արոնյանն իր ակտիվում ունի 4 հաղթանակ, ինը ոչ ոքի և մեկ պարտություն: Արոնյանի մտքի ու հաշվարկի նկատմամբ առավելության է կարողացել հասնել միայն ռուսաստանցի աշխարհի չեմպիոն Կրամնիկը: Մագնուս Կարլսենը, ի տարբերություն Արոնյանի, իր ակտիվում ունի 2 պարտություն, որոնք կրել է Լեկոյից և Անանդից, սակայն հաղթանակները մեկով ավելի են: Երրորդ հորիզոնականում հայտնված Անանդը 3 հաղթանակ է գրանցել: Միակ պարտությունը կրել է ադրբեջանցի Ռաջաբովի հետ խաղում, որի հետ էլ կիսել է 3-4-րդ տեղերը:
Մրցաշարի «Բ» խմբում ևս չեմպիոնի տիտղոսը հայ գրոսմայստեր է նվաճել: Սլովակիայի դրոշի ներքո հանդես եկող Սերգեյ Մովիսիյանը միանձնյա գլխավորել է մրցաշարի «Բ» խմբի աղյուսակը: Նա իր հաշվում առաջնության ավարտից հետո ունի 8 միավոր: Երկրորդ և երրորդ հորիզոնականներում են ֆրանսիացի Էթյեն Բակրոն և Անգլիան ներկայացնող Նայջլ Շորթը: Նշենք, որ այս հաղթանակով Մովսիսյանը հաջորդ առաջնությունում «Ա» բարձրագույն խմբում հանդես գալու իրավունք նվաճեց:

Հիշեցնենք, որ Կորուս Չեսս 2007-ի սուպերմրցաշարում Արոնյանը միակն էր, որ ողջ մրցապայքարի ընթացքում ոչ մի պարտություն չէր կրել: Նրան հաջորդում էին ադրբեջանցի Ռաջաբովը, Բուլղարիան ներկայացնող Տոպալովը և շախմատի աշխարհի չեմպիոն ռուսաստանցի Կրամնիկը:
Նշենք, որ մրցաշարի ներկայիս մասնակիցներից ամենաշատը` 5 անգամ, չեմպիոնի կոչումը նվաճել է հնդիկ շախմատիստ Վիշվանաթան Անանդը: Տոպալովը հաջողության է հասել 2, իսկ Գելֆանդն ու Կրամնիկը 1-ական անգամ:
«Կորուս Չեսս» առաջնությունն անընդմեջ անցկացվել է 1938 թվականից, սակայն այն մինչև 2002 թվականը կոչվել է «Հոգովենտուր»: Այս մրցաշարին մասնակցում են աշխարհի ամենաբարձր վարկանիշ ունեցող շախմատիստները: «Կորուս Չեսս 2008»-ը մեկնարկել էր հունվարի 12-ին և ավարտվեց նախօրեին: Այն անցկացվում էր Հոլանդիայի Վեյկ-ան-Զեե բնակավայրում:

Առաջնությունից հետո Արոնյանը հեղինակավո «64» շախմատային ամսագրի կանխատեսմամբ, ունի վարկանիշային 2755,3 գործակից և զբաղեցնում է 6-րդ հորիզոնականը: Ցուցակը 2812 գործակցով գլխավորում է Գարրի Կասպարովը, երկրորդ հորիզոնականում է աշխարհի գավաթակիր Վիշվանաթան Անանդը՝ 2793,3 գործակցով, իսկ Վլադիմիր Կրամնիկը 2786,5 վարկանշային միավորով 3-րդն է: Մագնուս Կարլսենը 2742,5 գործակցով 11-րդն է: Նշենք, որ այս վարկանշային ցուցակը տարբերվում է պաշտոնական վարկանիշներից: