Ձեր վստահելի աղբյուրը

Սեպտեմբերին Մեծամորի ատոմակայանի նոր էներգաբլոկի տեխնիկա-տնտեսական հաշվարկները պատրաստ կլինեն և 2012թ. կսկսվեն երկրորդ ժամանակակից էներգաբլոկի կառուցումը: Այս մասին այսօր Մեծամորի բնակիչների հետ հանդիպման ժամանակ հայտնեց վարչապետ, նախագահի թեկնածու Սերժ Սարգսյանը: «Գտնվել է 5 միլիոն դոլար: Սեպտեմբերին, ամենայն հավանականությամբ, կունենանք նոր էներգաբլոկի հաշվարկները: Ունենք գործընկեր, որը պատրաստ է գումարներ ներդնել: Հասկանալի է, որ դա մեծ հնարավորություններ կբացի մարզի և հանրապետության համար»,-նկատեց Սերժ Սարգսյանը:

«Մենք պարտավոր ենք հոգ տանել էներգետիկ անվտանգությանը: Մենք ամեն տարի ավելացնելու ենք ատոմակայանի անվտանգության համար ծախսվող միջոցները: Մենք շարունակելու ենք գործունեությունը` ատոմակայանի օգտակար գործողության գործակիցը բարձրացնելու համար»,- հայտարարեց նա` վստահեցնելով, որ ատոմակայանը դեռ մեծ հնարավորություններ ունի և այդ հնարավորությունները պետք է օգտագործել:

Նախագահի թեկնածուն, խոսելով այլ թեկնածուների կողմից տրվող խոստումների մասին, նշեց. «Դուք հնարավորություն ունեք համեմատելու մեր գործունեությունը, հնարավորություն ունեք տարբերելու, թե որն է նախընտրական խոստում և որը գործի սկիզբ: Մենք չենք թերագնահատում որևէ մեկին, մենք առաջարկում ենք մտածել և համեմատել»:
Սերժ Սարգսյանը հիշելով նախագահի թեկնածուներից մեկի այն արտահայտությունը, թե Հայաստանի պետական պարտքը ահռելի թվերի է հասել, նշեց. «Երբ նոր կառավարություն կազմեցինք, Հայաստանի արտաքին պարտքը կազմում էր ՀՆԱ-ի 49,2 տոկոսը: 2008-ի հունվարի դրությամբ մեր արտաքին պարտքը կազմում է ՀՆԱ-ի 16,9 տոկոսը: Խնդրում եմ համեմատել` երբ էր շատ Հայաստանի արտաքին պարտքը»,-առաջարկեց նախագահի թեկնածուն:

Սերժ Սարգսյանը հիշեցրեց, որ խորհրդարանական ընտրություններին ՀՀԿ-ն խոստացավ թոշակները ավելացնել 50 տոկոսով, սակայն ավելացավ 60 տոկոս, խոստացավ ավելացնել աշխատավարձերը և դրանք ավելացան, նաև սոցիալական ծախսերը աճեցին: «Մենք 2012 թվականին երկու անգամ ավելի լավ ենք ապրելու քան այսօր: Ծրագիր կազմելիս մենք նաև որոշակի թվեր ենք ներկայացրել, որոնց դուք էլ կարող եք ծանոթանալ»,-հայտնեց Սերժ Սարգսյանը: Նա կոչ արեց ամրապնդել հավատը և շարժվել դեպի բարեկեցիք Հայաստան:
Նախագահի թեկնածուն հանդիպում ունեցավ նաև Արմավիր քաղաքի բնակիչների հետ: «Մեր հիմնական նպատակներից մեկն այն է, որպեսզի Հայաստանի տարածքները հավասարաչափ զարգանան: Ես նկատի ունեմ` բարելավել կրթական օջախները, առողջապահությունը»,-իր ելույթում ասաց Սերժ Սարգսյանը:

Նա նշեց, որ իրենք շարունակելու են պետական օժանդակությունը: Սերժ Սարգսյանի խոսքով, 2007թ. Արմավիրում տնկվել է 3000 հեկտար այգի, ինչը խոսում է այն մասին, որ իրենց աշխատանքով կարող է վաստակել: «Մենք իհարկե պարտավոր ենք հոգ տանել այն մարդկանց մասին, ովքեր չեն աշխատում, սակայն նրանք ավելի լավ չեն ապրելու քան նրանք, ով աշխատում են»,-նշեց նախագահի թեկնածուն: Սերժ Սարգսյանը ասաց, որ իր ցանկությունն է, որպեսզի ժողովուրդը հավատա իշխանությանը և վստահի պետությանը:
Նշենք, որ Սերժ Սարգսյանը հանդիպում ունեցավ Բաղրամյանի տարածաշրջանի ընտրողների, ինչպես նաև վստահված անձանց հետ:
Նախագահի թեկնածուի օրակարգում էր նաև այցելություն զորամաս: