Ձեր վստահելի աղբյուրը

Գլխավոր դատախազության հատուկ աշխատանքային խումբը մինչ այժմ ստացել է 41 հաղորդում` ընտրական խախտումների մասին, դրանցից 20-ը լրատվամիջոցներից:

Աղվան Հովսեփյանն այսօր լրագրողների հետ հանդիպման ժամանակ դժվարացավ առանձնացնել ընտրախախտումներից ամենածանրը: Թեև քրեաիրավական առումով, որպես այդպիսին առանձնացրեց 4-րդ գյուղում տեղի ունեցած հրազենի գործադրմամբ դեպքը: Հիշեցնենք, որ 30.01.2008թ.՝ ժամը 21-ի սահմաններում Երեւան քաղաքի վարչական տարածքում գտնվող Հաղթանակ գյուղի բնակիչ Ս.Հարոյանը, հարբած, նախապես իր հետ վերցրած որսորդական հրացանով մուտք է գործել նույն գյուղի 6-րդ փողոցի թիվ 31 շենքի 1-ին հարկում տեղակայված՝ ՀՀ Նախագահի թեկնածու Սերժ Սարգսյանի նախընտրական շտաբ և կրակելով հեռուստացույցի վրա ու պատի ուղղությամբ, պահանջել կանչել շտաբի ղեկավարներին:

Գլխավոր դատախազն ընթացող քարոզարշավը, սակայն առանձնացրեց մեկ այլ հանգամանքով, այն է` խախտումների մասին սուտ հաղորդագրությունների առատությունը: Դրանց հեղինակներն, ըստ նրա, կարծես թե, առաջնորդվում են «ինչքան շատ սուտ ասեն, այնքան այդ ստերը կանցնեն ճշմարտության տեղ» սկզբունքով: Նա նաև հիշեց Ֆաշիստական Գերմանիայում Գեբելսին, ով ասում էր. «սուտը հարկավոր է ավելի հաճախ կրկնել, որ ճշմարտության տեղ անցնի»: «Կարծես թե, որոշ մարդիկ սա ընդունել են, որպես նշանաբան»,-ասաց Ա. Հովսեփյանը:

Աղվան Հովսեփյանի խոսքով, սուտ տեղեկություններ տարածողների նպատակը իրավապահ մարմիններին վարկաբեկելն է: Սակայն գլխավոր դատախազը վստահեցրեց, որ իրավապահներն աշխատում են, կատարում են իրենց պարտականությունները, թե’ ընտրությունից առաջ, թե’ ընտրության օրն ու ընտրությունից հետո, ավելին, ասաց նա, անելու են ամեն ինչ ընտրախախտումները կանխելու, եղածները բացահայտելու ու մեղավորներին պատասխանատվության ենթարկելու համար:

Գլխավոր դատախազը հիշեցրեց, որ քրեական օրենսգիրքը պատիժ է նախատեսում նաև զրպարտություն համար:

Տեղեկացնենք, որ ստացած հաղորդագրություններից 11-ի առիթով հարուցվել է քրեական գործ, 18-ով մերժվել է քրեական գործի հարուցումը, իսկ 11 գործ գտնվում է ստուգման ընթացի մեջ և ուսումնասիրությունից հետո միայն կկայացվեն համապատասխան որոշումներ: