Ձեր վստահելի աղբյուրը

Երևանում այսօր ստորագրվեց «Հայկական երկաթուղիներ» ՓԲԸ-ն «Հարավկովկասյան երկաթուղիներ» ՓԲԸ-ի կառավարմանը փոխանցելու կոնցեսիոն պայմանագիրը: Հիշեցնենք, որ այս ընկերությունը հանդիսանում է «Ռուսաստանի երկաթուղիներ» ԲԲԸ դուստր ձեռնարկությունը: Փաստաթուղթը ստորագրել են Հայաստանի կապի և տրանսպորտի նախարար Անդրանիկ Մանուկյանը և «Ռուսաստանի երկաթուղիներ» ԲԲԸ նախագահ Վլադիմիր Յակունինը:

Հայաստանի կառավարության որոշմամբ, «Հայաստանի երկաթուղիները» կլուծարվի: Միևնույն ժամանակ կառավարությունը հանձնարարել է ընկերությանն ազատել Զարգացման միջազգային ասոցիացիայի (IDA) 12.6 մլն դոլար չափով վարկի պարտավորություններից:

Դեկտեմբերի 21-ին հրապարակվել էր «Ռուսաստանի երկաթուղիների» ֆինանսական առաջարկը, որի համաձայն, ռուսական կողմը պատրաստ է Ադրբեջանի և Թուրքիայի կողմից շրջափակման պայմաններում երկրի երկաթուղային տնտեսությունում ներդնել 572 մլն դոլար: Դրանից 220 մլն դոլարը նախատեսվում է ներդնել առաջիկա հինգ տարիների ընթացքում: Հայ-թուրքական սահմանի բացման դեպքում ներդրումների ծավալը կհասնի 610 մլն դոլարի, իսկ Ադրբեջանի հետ սահմանը բացվելու դեպքում` 1.8 մլրդ դոլարի: Աբխազական երկաթուղու շահագործման դեպքում նախատեսվում է ներդնել 2.2 մլրդ դոլար:

Բացի հարկերից կոնցեսիոները պատրաստ է Հայաստանի բյուջե վճարել իր տարեկան եկամտի 2 տոկոսը: Ռուսական կողմի գնահատականով, ներդրումների վերադարձվելիությունը կկազմի 20 տարի: Կոնցեսիոն պայմանագրի նախագիծը 2008թ. փետրվարի 7-ին արժանացել է կառավարության հավանությանը: Կոնցեսիոն կառավարումը տևելու է 30 տարի` 20 տարի երկարացնելու իրավունքով: