ՔՈՉԱՐՅԱՆԸ ՄՈՍԿՎԱՅՈՒՄ ՀԱՆԴԻՊԵԼ Է ՊՈՒՏԻՆԻՆ ԵՎ ՍԱՀԱԿՇՎԻԼՈՒՆ

Քաղաքական 13:54 23/02/2008

ՔՈՉԱՐՅԱՆԸ ՄՈՍԿՎԱՅՈՒՄ ՀԱՆԴԻՊԵԼ Է ՊՈՒՏԻՆԻՆ ԵՎ ՍԱՀԱԿՇՎԻԼՈՒՆ

Նախագահ Ռոբերտ Քոչարյանը փետրվարի 23-ին Մոսկվայում ՌԴ կառավարության ընդունելությունների տանը մասնակցել է ԱՊՀ անդամ պետությունների ղեկավարների ոչ պաշտոնական գագաթնաժողովին: Այս մասին տեղեկացանք նախագահի մամլո գրասենյակից:

ԱՊՀ երկրների ղեկավարների ոչ պաշտոնական գագաթնաժողովի շրջանակում կայացել է Հայաստանի և Ռուսաստանի նախագահներ Ռոբերտ Քոչարյանի և Վլադիմիր Պուտինի հանդիպումը:

ՌԴ նախագահը նախ շնորհակալություն է հայտնել Հայաստանի գործընկերոջը` գագաթնաժողովին մասնակցելու համար, ինչը նաև լրացուցիչ առիթ է հանդիպելու, զրուցելու համար: Վլ. Պուտինը հույս է հայտնել, որ ՀՀ նորընտիր նախագահի առաջին այցելություներից մեկը Ռուսաստան կլինի, և ՀՀ նախագահի միջոցով իր հրավերը փոխանցել է Սերժ Սարգսյանին:

Վլ. Պուտինը նաև շնորհակալություն է հայտնել ՀՀ նախագահին` նշելով. «Անցած տարիներին Ձեր անմիջական մասնակցությամբ շատ բան է արվել հայ-ռուսական հարաբերությունների զարգացման ուղղությամբ` ինչպես տնտեսական, այնպես էլ` քաղաքական ոլորտում»:

Ռ. Քոչարյանն իր հերթին շնորհակալություն է հայտնել ջերմ խոսքերի համար. «Եթե գնահատելու լինենք անցած ճանապարհը, ապա, իրոք, երկկողմ հարաբերությունները բոլոր ուղղություններով առաջընթաց են արձանագրել: Այդ տարիներն առանձնացել են իրենց արդյունավետությամբ թե Հայաստանի, թե Ռուսաստանի համար, և այդ ամբողջությունը հանգեցրել է հայ-ռուսական առանձնահատուկ հարաբերությունների»,-ընդգծել է Ռ. Քոչարյանը:

Նա ավելացրել է, որ Հայաստանում գնահատում են Ռուսաստանի հետ հարաբերությունները, և «կարծում եմ, որ շատ կարևոր է այն հանգամանքը, որ տնտեսական համագործակցությունը դարձել է բազային բաղադրիչ` երկկողմ հարաբերությունների լոկոմոտիվը»:

ՀՀ նախագահը նշել է, որ երկկողմ հարաբերությունների մակարդակով պայմանավորված` մեծ է նաև քննարկվող հարցերի օրակարգը, և միշտ դրանց քննարկման անհրաժեշտություն է առաջանում: Մոսկվայում Ռոբերտ Քոչարյանը հանդիպում է ունեցել նաև Վրաստանի նախագահ Միխեիլ Սահակաշվիլիի հետ:

Երկու երկրների ղեկավարները հատուկ ուշադրություն են դարձրել Հայաստանի և Վրաստանի տնտեսական գործակցության հարցերին և պայմանավորվել են, որ դրանց ավելի մանրամասն քննարկման նպատակով մոտ ժամանակներս պաշտոնական այցով Երևան կժամանի Վրաստանի վարչապետ Լադո Գուրգենիձեն:

Տեքստում սխալ կամ վրիպակ նկատելու դեպքում, ուղարկեք խմբագրին հաղորդագրություն` նշելով տվյալ սխալը, այնուհետև սեղմելով Ctrl-Enter: