Ձեր վստահելի աղբյուրը

Հայաստանի մարդու իրավունքների պաշտպան Արմեն Հարությունյանը ողջունել է նախագահական ընտրություններում հաղթած Սերժ Սարգսյանի հանդուրժողականության կոչը և ընդդիմության հետ երկխոսության գնալու պատրաստակամությունը: Այսօրվա ասուլիսի ժամանակ Ա. Հարությունյանը բոլոր քաղաքական գործիչներին և ԶԼՄ-ներին առաջարկեց առաջնորդվել արժեքային նման համակարգով:

Պաշտպանի խոսքով, հետընտրական շրջանում Հայաստանում նկատվող բոլոր երևույթները խոսում են նրա մասին, որ երկիրը դեռևս ամբողջովին չի ազատվել տոտալիտարիզմի որոշ դրսևորումերից: Դրա հետ մեկտեղ նա կարծում է, որ մի պահ հարկավոր է դադար տալ ու լսել նրան, ում հետ մենք համաձայն չենք: «Դա միակ ելքն է ստեղծված իրավիճակից դուրս գալու համար»,-նշեց Ա. Հարությունյանը:

Օմբուդսմենը համոզված է, որ հասարակության հիմնական «թշնամին» անհանդուրժողականությունն ու բևեռվածությունն է, և որ այսօրվա հիմնական խնդիրների բացահայտման ու լուծման համար քաղաքական կամք է անհրաժեշտ:
Մարդու իրավունքների պաշտպանը փաստեց, որ հայ հասարակությունն այսօր բաժանվել է երկու մասի. քաղաքացիների մի մասը ուզում է մասնակցել հանրահավաքներին, իսկ մյուսը` ոչ: «Սակայն չի կարելի քայլել այն ուղիով, որը կարող է հանգեցնել նրան, որ հասարակության մի մասն իրեն օտարված զգա»,- ասաց Ա. Հարությունյանը: