ՄՐՑՈՒՅԹՆԵՐ` ՉԻՆԱՍՏԱՆՈՒՄ, ԲՈՒԼՂԱՐԻԱՅՈՒՄ ԵՎ ՌՈՒՄԻՆԻԱՅՈՒՄ ՍՈՎՈՐԵԼՈՒ ՀԱՄԱՐ

Կրթություն, գիտություն 10:41 27/02/2008

ՄՐՑՈՒՅԹՆԵՐ` ՉԻՆԱՍՏԱՆՈՒՄ, ԲՈՒԼՂԱՐԻԱՅՈՒՄ ԵՎ ՌՈՒՄԻՆԻԱՅՈՒՄ ՍՈՎՈՐԵԼՈՒ ՀԱՄԱՐ

Կրթության և գիտության նախարարությունը հայտարարում է մրցույթ` 2008-2009 ուսումնական տարում Չինաստանում, Ռումինիայում և Բուլղարիայում բուհական և հետբուհական կրթություն ստանալու համար: Ինչպես տեղեկացանք ԿԳՆ պաշտոնական կայքէջից, մրցույթին կարող են մասնակցել հանրակրթական դպրոցների և բուհերի շրջանավարտները կամ ավարտական դասարանում և կուրսում սովորող Հայաստանի քաղաքացիները:
Մրցույթին մասնակցել ցանկացողները փաստաթղթերը կարող են ներկայացնել մինչև մարտի 10-ը կրթության և գիտության նախարարության միջազգային համագործակցության և սփյուռքի վարչություն: Մրցույթը տեղի կունենա մարտի 15-ից մինչև 31-ն ընկած ժամանակահատվածում, Երևանի Նելսոն Ստեփանյանի անվան թիվ 71 միջնակարգ դպրոցում:

Չինաստանի բարձրագույն ուսումնական հաստատություններում սովորելու համար նախապատվությունը տրվում է չինարեն, անգլերեն և ռուսերեն լեզվի իմացությամբ դիմորդներին` ըստ հաջորդականության: Բուլղարիայի բարձրագույն ուսումնական հաստատություններում սովորելու համար դիմորդները պետք է տրիապետեն անգլերեն կամ բուլղարերեն լեզուներին: Իսկ Ռումինիայի բարձրագույն ուսումնական հաստատություններումսովորելու համար դիմորդները պետք է տիրապետեն անգլերեն կամ ռումիներեն լեզուներին:

Նշենք, որ բուհական կրթաթոշակի համար հավակնող դիմորդները պետք է հանձնեն քննություններ` 2007 թվականի Հայաստանի բուհերի ընդունելության առարկայական ծրագրերին համապատասխան՝ ըստ ընտրած մասնագիտության, ինչպես նաև անցնեն հարցազրույցի փուլ: Ասպիրանտական կրթաթոշակին հավակնող դիմորդները պետք է հանձնեն մասնագիտական քննություն:

Տեքստում սխալ կամ վրիպակ նկատելու դեպքում, ուղարկեք խմբագրին հաղորդագրություն` նշելով տվյալ սխալը, այնուհետև սեղմելով Ctrl-Enter: