Ձեր վստահելի աղբյուրը

«Այսօրվա մեր երկրի իրավիճակը պահանջում է լուրջ մոտեցում ցուցաբերել սումգայիթյան հարցին»,- այսօր կայացած ասուլիսում ասաց հրապարակախոս Հրայր Ուլուբաբյանը: Նրա խոսքով, շարունակվում է հակարմարտությունը Ադրբեջանի ու Թուրքիայի հետ, ովքեր միջազգային ատյաններում բարձրացնում են հայերի «ագրեսոր» լինելու հարցը: «Այս քսան տարիների ընթացքում մեր երկրի ղեկավարներից, պաշտոնական անձերից ոչ մեկը Սումգայիթի հարցը միջազգային դատարաններում չի բարձրացրել: Սումգայիթում կատարվածը համապատասխանում է ցեղասպանության կոնվեցիայի փաստերին»,-նշեց Հ. Ուլուբաբյանը: Նա ավելացրեց, որ եթե Թուրքիային Եվրոմիության կազմի մեջ մտնելուն խոչընդոտում է հայերի ցեղասպանությունը չճանաչելու հարցը, Ադրբեջանին կարող է խանգարել Սումգայիթում կատարվածը:

Ազգային ժողովի, իր բնորոշմամբ, հատուկենտ հայրենասեր պատգամավորներին՝ Րաֆֆի Հովհաննիսյանին, Լարիսա Ալավերդյանին, Վիկտոր Դալլաքյանին, հրապարակախոսը խնդրեց Սումգայիթի հարցը դնել քննարկման՝ որպես ցեղասպանություն ու դիմել միջազգային դատարան: Հ. Ուլուբաբյանի փաստերով, չնայած նրան, որ պաշտոնապես հայտարարված է 26-27 զոհ, 1988թ. փետրվարի 26-29-ը Սումգայիթում սպանվել են 100-ից ավել հայ:

Փաստաբանների պալատի նախագահ Ռուբեն Սահակյանի վստահեցմամբ, Սումգայիթում կատարվածը ցեղասպանություն է, և ամբողջությամբ համապատասխանում է ցեղասպանության կոնվեցիայի բանաձևին: «Սումգայիթում կատարվածը կազմակերպված գործողություն է եղել: Այն կազմակերպված է եղել ԽՍՀՄ ամենաբարձր մարմնի՝ Գորբաչովի իմացությամբ՝ համաձայնեցված ադրբեջանական իշխանությունների հետ»,-ասաց Ռ. Սահակյանը: Նրա խոսքով, անցած քսան տարիների ընթացքում մենք անդառնալի կորուստ ենք ունեցել, քանի որ «ոչ ոք ոչ մի քայլի չի դիմել սումգայիթյան հարցը լուծելու ուղղությամբ»: «Մոռացել ենք այս տարիների ընթացքում, բայց այսօր պետք է գոնե սկսենք այդ դեպքերին վերաբերող փաստաթղթերի հավաքումը»,-նշեց նա:

Նշենք, որ 1988թ. փետրվարի 27-29-ը 250.000 բնակչություն ունեցող Սումգայիթ քաղաքում, որը Բաքվից գտնվում էր ընդամենը 25 կմ հեռավորության վրա, կատարվել են զանգվածային անկարգություններ ու ջարդեր: Պաշտոնական տվյալներով Սումգայիթում բռնաբարվել են 12 կին: Բայց այս ամենը միայն պաշտոնական տվյալներով, քանի որ վկաները լիովին այլ փաստեր են ներկայացնում: