Ձեր վստահելի աղբյուրը

Այսօր առաջին նախագահ Լևոն Տեր-Պետրոսյանի հետ հանդիպման ժամանակ լրագրողներին բոլորից շատ հետաքրքրում էր իրենց հետագա քայլերը, ինչի առնչությամբ նա ասաց, «Օրենքով մեզ տրված միջոցներից մենք կօտվենք: Կդիմենք քաղաքապետարան կպահանջենք հանրահավաքների, երթերի պիկետների թույլտվություններ: Կտան` կտան, չեն տա` դրանից հետո մենք իրավունք ունենք ինչպես անցյալում, այնպես էլ այսօր կազմակերպել մեր միջոցառումները: Ժողովրդի հանրահավաքների ու երթերի կազմակերպումն արգելվում կամ սահմանափակվում է միայն արտակարգ դրություն ժամանակ: Կգնանք, էլի կծեծեն` թող ծեծեն, էլի կջարդեն` թող ջարդեն, էլի կձերբակալեն` խնդիր չկա»:

Հարցին, թե հնարավո՞ր է արտակարգ դրություն հայտարարվի, առաջին նախագահը պատասխանեց, որ ամեն ինչ հնարավոր է:
Ինչ վերաբերում է ժողովրդի դեմ ուժ չկիրառելու միջազգային կառույցների կողմից վերջին օրերին հնչող հայտարարություններին, Լ.Տեր-Պետրոսյանը նախ հիշեցրեց, որ այդ մասին խոսել են ԵԱՀԿ նախագահը, ԵԽ գործող նախագահը, Կովկասում ԵՄ ներկայացուցիչը, ինչպես նաև ԵԱՀԿ-ում ԱՄՆ ներկայացուցիչը, ապա հավելեց, որ այդ հայտարարություններից հետո կատարվածը «մարտահրավեր էր ոչ միայն մեր ժողովրդին, այլ նաև ողջ քաղաքակիրթ աշխարհին»: Առաջին նախագահը տեղեկացրեց, որ կատարվածի մասին տեղեկացվել են և դեսպանատները, և' Հայաստանյան դիվանագիտական ներկայացուցչությունները:

Հարցին, թե այսօր ժամը 15-ին հանրահավաք կլինի, Լ. Տեր-Պետրոսյանը պատասխանեց, որ իր շտաբի կողմից այդպիսի որոշում կայացված չի եղել, սակայն մարդիկ իրավունք ունեն ինքնաբուխ հանրահավաքներ իրականացնել: «Ես չգիտեմ, իմ կապերն էլ են խզված: Իմ ընկերներից մեկ-երկուսի հետ կապ ունեմ, բայց մենք 1-2-ով որոշում չենք կարող ընդունել: Հնարավոր է ինքնաբուխ դա ծագի և մենք պարտավոր ենք դա վերահսկել, կառավարել, ղեկավարել: Եթե ինձ հնարավորություն տան այստեղից դուրս գալու, ես պարզ է, ժողովրդի հետ պետք է լինեմ»,- նշեց նա: