Ձեր վստահելի աղբյուրը

«Ուզում եմ մեկ անգամ ևս փաստել, որ տեղի ունեցավ այն, ինչի մասին ամիսներ շարունակ մենք խոսում էինք, բայց չկարողացանք կանխել,  և եթե չկարողացանք կանխել, ապա մեղավոր ենք նաև մենք»,-այսօր կառավարության նիստում` մինչ օրակարգի հարցերին անցնելն ասաց վարչապետ, նորընտիր նախագահ Սերժ Սարգսյանը:

Նրա խոսքով, այսօր հարկավոր է մտածել դրա հետևանքների վերացման մասին: «Բացի մարդկային կորուստներից մենք ունեցանք նյութական կորուստներ, բարոյական կորուստներ` կապված մեր երկրի անվտանգության հետ, և կորուստներ` կապված մեր երկրի միջազգային հեղինակության հետ»,-նկատեց Սերժ Սարգսյանը: Նա ընդգծեց, որ քաղաքապետարանը, ֆինանսների և արդարադատության նախարարությունները շատ արագ պետք է արձագանքեն և առաջարկություններ ներկայացնեն: Նա ասաց, որ հասարակության մեջ չարությունը մեծացել է, հասարակությունը երկփեղկված է, և «այս առումով, ես ակնկալում եմ բոլորիդ ակտիվ աշխատանքը այս ուղղությամբ»:

Վարչապետը նշեց, որ պետք է մտնել երկխոսության մեջ, վիճել, բացատրել նույնիսկ` եթե դիմացինդ չի հասկանում: «Նույնիսկ` եթե դիմացինդ ատելությունից կուրացած է»,-ընդգծեց Սերժ Սարգսյանը: Լուծում պահանջող մյուս խնդիրների շարքում նորընտիր նախագահը նշեց, որ պասիվություն է նկատում բոլորի աշխատանքներում, միջազգային կազմակերպությունների հետ կապված և ընդհանրապես, իրավիճակը ճիշտ ներկայացնելու հետ կապված: «Ես առաջարկում եմ, որպեսզի բոլորդ ուշադրությամբ ուսումնասիրեք բոլոր այն նյութերը, որոնք մատուցվում են պաշտոնական խողովակներով, պետական կառավարման մարմինների կողմից և ձեզ հավաստիացնում եմ, որ այս տեղեկատվությունը ճշմարտություն է և առանց վարանելու դուք կարող եք հենվել այս փաստերի վրա»,-հստակեցրեց Սերժ Սարգսյանը:

Վերջինս նկատեց, որ մեր բանակը կարողացավ մեկ անգամ ևս ապացուցել, որ կայացած կառույց է և կարողացավ համարժեք արձագանքել մեր անվտանգությանն սպառնացող խնդիրներին: «Մենք այս իրավիճակը նկարագրել էինք Ազգային անվտանգության հայեցակարգում, այն ժամանակ, երբ շատ-շատերին թվում էր, թե սա տեսական դրույթ է, որ այսպիսի բաներ հնարավոր չեն: Ցավոք սրտի, հնարավոր եղավ»,-հայտնեց կառավարության ղեկավարը:

Նա ընդգծեց, որ բոլոր մեղավորները պատասխանատվության են ենթակվելու: «Սա հարյուր տոկոս խոստանում եմ բոլորիդ. սա խոստում չի, սա պարտականություն է, որ ես անելու եմ»,-շեշտեց վարչապետը:

Նա ֆինանսների և էկոնոմիկայի նախարությանը, մաքսային և հարկային մարմիններին հանձնարարեց «մի գրամ իսկ չթեթևացնել իրենց աշխատողների ծանրաբեռնվածությունը»: