Ձեր վստահելի աղբյուրը

Մարտի 1-ին Երեւան քաղաքում հրահրված զանգվածային անկարգություններին մասնակցելու կասկածանքով մինչեւ մարտի 6-ն ընկած ժամանակահատվածում ոստիկանության բաժիններ բերման է ենթարկվել 407 մարդ, 184-ը` Երեւանում, 223-ը` մարզերում: Կալանքի է վերցվել 23 անձ, 50-ը ձերբակալվել են: Ինչպես հայտնում են ՀՀ ոստիկանությունից, երեք անձանց նկատմամբ կազմված նյութերն ուղարկվել են ՀՀ Վարչական դատարան: Նարկոլոգիական դիսպանսեր ստուգման է ուղարկվել 7 մարդ:

Մարտի 1-ին եւ 2-ին հանրապետության հիվանդանոցներում եւ ոստիկանության հոսպիտալում բուժման կուրս է անցել 217 մարդ: Հրազենային, բեկորային եւ տարբեր վնասվածքներով ոստիկանության 33 աշխատակից եւ զինծառայող բուժօգնության են դիմել ոստիկանության բուժվարչության պոլիկլինիկա: Բուժման կուրս անցնողներից 41-ը քաղաքացիական անձինք են, 43-ը` ոստիկանության ծառայողներ, 133-ը` 18-ից 20 տարեկան զինծառայողներ:

Մարտի 1-ին Երեւան քաղաքում հրահրված զանգվածային անկարգությունների հետեւանքով հրդեհվել եւ այրվել է 63 ավտոմեքենա: Ջարդվել վնասվել և թալանվել է ոստիկանության 40 ավտոմեքենա: Ամբողջովին այրվել է ոստիկանության 19 մեքենա: Հրդեհվել, այրվել, վնասվել եւ ջարդվել է 27 ավտոբուս ու 6 տրոլեյբուս:

Ոստիկանության ստորաբաժանումների իրականացրած օպերատիվ միջոցառումների եւ խուզարկությունների արդյունքում` մարտի 6-ի դրությամբ, հայտնաբերվել, առգրավվել եւ փորձաքննության է ներկայացվել 20 ատրճանակ, 4 ինքնաձիգ, 1 գնդացիր, 7,62 մմ տրամաչափի 13 հրացան, որսորդական 24 հրացան, մարտական` 2633 եւ որսորդական 1,122 փամփուշտ, 2 ական և 15 նռնակ:

Մարտի 6-ի դրությամբ օպերատիվ իրավիճակը ինչպես մայրաքաղաքում, այնպես էլ հանրապետությունում կայուն է: Մարդկանց կուտակումներ և հասարակական կարգի խանգարման փորձեր չեն արձանագրվել: ՀՀ ոստիկանության ստորաբաժանումներն անում են ամեն ինչ զանգվածային անկարգությունների մասնակիցներին հայտնաբերելու և կայուն հասարակական կարգ ու կանոն պահպանելու ուղղությամբ: