Ձեր վստահելի աղբյուրը

Այսօր Հայաստանի փոխվարչապետ, տարածքային կառավարման նախարար Հովիկ Աբրահամյանի մոտ «Երևան Ջուր» ՓԲԸ ընթացիկ գործունեության վերաբերյալ քննարկում է կայացել: Հայաստանի տարածքային կառավարման նախարարության հասարակայնության հետ կապերի բաժնի տեղեկացմամբ, քննարկմանը մասնակցել են նաև Հայաստանի տարածքային կառավարման նախարարության ջրային տնտեսության պետական կոմիտեի նախագահ Անդրանիկ Անդրեասյանը, «Երևան Ջուր» ՓԲԸ գլխավոր տնօրեն Սերժ Պոպոֆֆը:

Աղբյուրի հաղորդմամբ, ընկերության տնօրինությունը ներկայացրել է 2007 թվականին կատարված աշխատանքների համառոտ նկարագիրը, ըստ որի մի շարք միջոցառումների արդյունքում բարձրացել է ջրի անվտանգության համակարգը, ներդրվել են շարժական լաբորատոր կայաններ, ձևավորվել է ամենօրյա ջրի որակի հսկողության մոնիտորինգի համակարգը: Սպառողների բողոքների և առաջարկների արագ արձագանքման ուղղությամբ ներդրվել է “1-85” հեռախոսի շուրջօրյա ծառայությունը:
Կատարված աշխատանքներն ամբողջացվել են ընկերության ֆինանսական կայունությամբ, որը հնարավորություն է տվել նրան սուբսիդավորվող ընկերությունից վերաճել խոշոր հարկատուի: 2007թ-ին Հայաստանի պետական բյուջե է փոխանցվել շուրջ 1.9 մլրդ դրամ: Սակայն դեռևս չի հաջողվել ցանկալի արդյունքներ գրանցել ինչպես ջրամատակարարման տևողության բարձրացման, այնպես էլ ջրամատակարարման ցանցից հոսակորուստների նվազեցման ուղղությամբ, որոնք դեռևս երևանցիների արդարացի դժգոհության պատճառ են մնում:

2007թ. Համաշխարհային բանկի շուրջ 22 մլն ԱՄՆ դոլար արժողությամբ վարկային ծրագրի շրջանակներում, ինչպես նաև սեփական միջոցներից ներդրումներ են կատարվել` ուղղված քաղաքի տարբեր շրջաններում` Շենգավիթում, Նորագավիթում, Արաբկիրում, և այլ ջրամատակարարման ու ջրահեռացման համակարգերի բարելավմանը:

2008թ. ներդրումային այդ ծրագրերով շարունակական միջոցառումներ են նախատեսվում Զեյթունում, Քանաքեռում, Սարի-Թաղում, Նորք-Մարաշում, Եղվարդ քաղաքում, Գառնի, Արամուս գյուղերում և այլուր: Արդյունքում, ջրամատակարարման տևողությունը կհասցվի պայմանագրով նախատեսված ցուցանիշին, կբարձրացվի ջրամատակարարման հուսալիությունը, հետևողական քայլեր կիրականացվեն ջրակորուստները նվազեցնելու ուղղությամբ:

Միաժամանակ «Հայաստանի և Ֆրանսիայի կառավարությունների միջև ձեռք բերված պայմանավորվածությունների համաձայն նախատեսվում է շուրջ 26 մլն եվրո ներդրումներ իրականացնել Երևան քաղաքի ջրահեռացման համակարգերի վերանորոգման, հեռացվող ջրերի մաքրման համակարգերի վերականգնման ուղղությամբ:

Փոխվարչապետ, Հայաստանի տարածքային կառավարման նախարար Հովիկ Աբրահամյանը համապատասխան մարմինների ուշադրությունը հրավիրեց մի շարք խնդիրների, մասնավորապես, հոսակորուստների աճի, հասույթների նվազման վրա և հանձնարարեց դրանց լուծման ուղղությամբ քայլեր ձեռնարկել: Հայաստանի փոխվարչապետը հանձնարարականներ տվեց` իրականացվող աշխատանքների շարունակական բնույթն ապահովելու ուղղությամբ: