Ձեր վստահելի աղբյուրը

Տնտեսական մրցակցության պաշտպանության պետական հանձնաժողովի կողմից առաջին անհրաժեշտության սպառման մոտ 35 ապրանքային շուկաններում իրականացվող մոնիտորինգի արդյունքում պարզվել է, որ 10-15 անուն ապրանք թանկացել է, 5-6-ի դեպքում` գնաճը չնչին` 0.01-0.02 տոկոս, 9-ի դեպքում գրանցվել է 2-9 տոկոս գնանկում:

Այսօր կառավարությունում առևտրի և տնտեսական զարգացման նախարար Ներսես Երիցյանի հետ համատեղ ասուլիսում նման տվյալներ հրապարակեց հանձնաժողովի նախագահ Աշոտ Շահնազարյանը: Նրա խոսքով, արձանագրված գնաճը պայմանավորված է միջազգային շուկայում գների բարձրացմամբ: Նա միաժամանակ ընդգծեց, որ Հայաստանում գնաճի միտումները երկու անգամ զիջում են միջազգայիին գնաճի միտումներին: Ըստ նրա, գնաճի ցուցանիշները, կախված տվյալ ապրանքի տարատեսակներից ու այն բանից, թե որտեղից է այն ներկրվում, տարբերվում են:

Ն. Երիցյանի խոսքով, գնաճի առավել արտառոց ցուցանիշներ են գրանցվել հացի` 8-15 տոկոս, ալյուրի`11-15 տոկոս, ձեթի, յուղի, բրինձի շուկաներում: Ձեթի, բրինձի, կարագի գների աճը, ըստ նախարարի, բացատրվում է համաշխարհային գործընթացներով, խախտվել է առաջարկի և պահանջարկի համամասնությունը: «Հացահատիկի ներկրման գները չեն փոխվել, ճշտել ենք, ալյուր վաճառողները ևս իրենց կողմից սահմանված գները չեն փոխել: Գները փոխվել են մանրածախ շուկայում, այստեղ կա խեղում»,-ասաց Ն. Երիցյանը:

Նրա խոսքով, վարչապետը հստակ հանձնարարություն է տվել, որ ցորեն-հաց շղթան ամբողջությամբ մանրամասն ուսումնասիրվի, ներկայացվեն բոլոր պրոցեսները, արդյունքները և դրանց հիման վրա արված առաջարկությունները: Կառավարության ղեկավարին առաջիկա մի քանի օրերի ընթացքում ստեղծված միջգերատեսչական հանձնաժողովը կներկայացնի օրենսդրական փոփոխությունների փաթեթ, որը, ըստ Ա. Շահնազարյանի, հնարավորություն կտա ավելի հստակ վերահսկողություն սահմանել և ապահովել պետական բյուջ մուտք գործող եկամուտների աճ:

Ուշագրավ է, որ ներկրող ընկերությունները ցորենի գնման վերաբերյալ պայմանագրերը կնքել են ավելի ցածր գներով, քան այժմ առաջարկվում է միջազգային շուկաներում: Ա. Շահնազարյանն էլ իր հերթին նշեց, թե որոշ տնտեսվարողների հետ ունեցած քննարկումներից հետո եկել են այն համոզման, որ ալյուրի, ինչպես նաև այլ ապրանքների ներկայիս գները կպահպանվեն մինչև հուլիս` այսինքն մինչև առաջին բերքի ստանալը: Իսկ մինչ այդ մոնիտորինգը կշարունակվի:

Ի դեպ, Ա. Շահնազարյանը հայտնեց, որ գների չհիմնավորված բարձրացման համար որոշ տնտեսվարողների նկատմամբ տույժ ու տուգանք կիրառելուց հետո նրանք ավելի զգոն են դարձել:

Ն. Երիցյանը, հղում անելով միջազգային փորձագետների` առատ բերքատվության վերաբերյալ կանխատեսումներին, նշեց, որ 2009-ին աշխարհում գնանկում կնկատվի: Նախարարի խոսքով, այսօրվա մեր մարտահրավերը պետք է լինի ապագայում ևս բարձր տնտեսական աճի պահպանումը, որպեսզի պետությունը կարողանա դիմակայել գնաճին: Նա հիշեցրեց, որ այս տարի, կանխատեսումների համաձայն, Հայաստանի տնտեսական աճը կգերազանցի տասը տոկոսը, ինչը մյուս երկրների համեմատ 2-3 անագամ ավելի է: Նա մատնացույց արեց նաև այն կանխատեսումները, որ ԱՄՆ-ում և Եվրոպական մի շարք երկրներում այս տարի տնտեսական աճը կլինի զրոյական մակարդակի: