Ձեր վստահելի աղբյուրը

Բելգրադում նախօրեին տեղի ունեցած վիճակահանության արդյունքում «Եվրոտեսիլ-2008» միջազգային մրցույթում Հայաստանը ներկայացնող Սիրուշոն մայիսի 20-ին տեղի ունենալիք առաջին կիսաեզրափակիչում հանդես է գալու 14 համարի ներքո:
Մրցույթում Սիրուշոն ներկայացնելու է «Քելե-քելե» երգը, որի օգտին մարտի 8-ին հանրային հեռուստաընկերության ուղիղ եթերում տեղի ունեցած երաժշտական շոուի ընթացքում SMS քվարկության միջոցով ձայն էին տվել հեռուստադիտողների 86.5 տոկոսը: Երգի հեղինակն է Արթուր Տեր-Հովակիմյանը, իսկ բառերի հեղինակը երգչուհին է:

Նշենք, որ վիճակահանության արդյունքում առաջին երեք համարը քաշած մասնակիցներն իրավունք ունեն ընտրել այլ համարներ: Այսպես, Ադրբեջանի ներկայացուցիչը, որին առաջին համարն էր ընկել, հրաժարվել է հանդես գալ այդ համարի տակ և որոշել է երգել յոթերորդը:
Երկրորդ տեղը ընկել է Հունաստանին, որը որոշել է հանդես գալ վերջինը՝ 19-րդը: Ռուսաստանի ներկայացուցիչ Դիմա Բիլանը վիճակահանության արդյուքնում հանդես էր գալու երրորդը, բայց որոշել է երգել 18-րդը:

Առաջին կիսաեզրափակիչում հանդես են գալու 19 երկիր՝ Հայաստան, Ռուսաստան, Չերնոգորիա, Ֆինլանդիա, Հունաստան, Իռլանդիա, Իսրայել, Լեհաստան, Բոսնիա-Հերցոգովինա, Էստոնիա, Հոլանդիա, Ռումինիա, Մոլդավիա, Սլովենիա, Նորվեգիա, Անդորրա, Բելգիա, Սան-Մարինո և Ադրբեջան:
Կիսաեզրափակիչի երկրորդ խմբում հադես են գալու Խորվաթիան, Դանիան, Բուլղարիան, Պորտուգալիան, Ուկրաինան, Շվեցարիան, Մակեդոնիան, Իսլանդիան, Կիպրոսը, Լատվիան, Բոլոռուսը, Հունգարիան, Ալբանիան, Շվեդիան, Թուրքիան, Լիտվիան, Վրաստանը, Չեխիան, Մալթան:
Մրցույթին մասնակցող երկրների քանակն այս տարի ավելացել է, այդ իսկ պատճառով կանոնները փոփոխվել են: Մրցույթն անցկացվելու է երկու կիսաեզրափակիչով՝ մայիսի 20-ին և 22-ին, իսկ եզրափակիչը մայիսի 24-ին է: Մրցույթին մասնակցում են ավելի քան 40 երկիր, որից եզրափակիչ անցնելու են միայն 25-ը:

Նշենք, որ նախորդ տարի երաժշտական մրցույթի հաղթող է ճանաչվել սերբ Մարիա Շերիֆովիչը՝ կատարելով «Աղոթք» երգը:
Այս տարի Հայաստանն արդեն երրորդ անգամ է մասնակցելու «Եվրոտեսիլ» մրցույթին: 2006թ. մայիսին Հայաստանը ներկայացրել է Անդրեն՝ Աթենքում կատարելով «Without Your Love» երգը, իսկ 2007թ. Հայկոն՝ ներկայացնելով «Anytime You Need» երգը: Երկու դեպքում էլ Հայաստանը զբաղեցրել է 8-րդ տեղը: