Ձեր վստահելի աղբյուրը

Մարտի 22-ին Արցախում տևականորեն մոլեգնած քամին հսկայական վնասներ է պատճառել հանրապետության բնակֆոնդին և կենսագործունեության բազմաթիվ օբյեկտների: ԼՂՀ նախագահի կարգադրությամբ անմիջապես ստեղծվել է ավերիչ փոթորկի հետևանքները ուսումնասիրող և վնասների վերականգնողական աշխատանքները համակարգող հանրապետական շտաբ վարչապետ Արա Հարությունյանի գլխավորությամբ: Այս մասին հայտնեցին ԼՂՀ կառավարության տեղեկատվության և հասարակայնության հետ կապերի վարչությունից:

Այսօր ԼՂՀ կառավարության ղեկավարը հրավիրել է շտաբի անդամների խորհրդակցություն` ի մի բերելու նախորդ օրերին կատարված ուսումնասիրություններն ու աշխատանքները: Զեկուցվել է, որ նյութական մեծ վնասներ են արձանագրվել հատկապես մայրաքաղաքում, Մարտունու, Մարտակերտի և Հադրութի շրջաններում: Վերջնականապես ճշտվում են լրջորեն տուժած տների և սոցիալական նշանակության օբյեկտների թվաքանակը և վնասների իրական չափերը: Նախնական տվյալներով ընդհանուր վնասը կազմում է շուրջ 250 մլն դրամ:

Մարտի 23-ից վերականգնողական աշխատանքներ են ընթանում Ստեփանակերտում և հանրապետության մի շարք տուժյալ բնակավայրերում: Արցախցիներին օգնության են եկել հայաստանյան 70 շինարարներ: Հայաստանից առաքվում են նաև շինանյութեր:

Վարչապետ Ա.Հարությունյանը հայտարարել է, որ պետությունը տուժյալներին օժանդակում է վերականգնելու անմիջականորեն կրած վնասը: Առաջնահերթորեն կվերականգնվեն բնակարանները և դպրոցները: Աշխատանքների մի մասը քաղաքացիները կկատարեն ինքնուրույն, որոնց կհատկացվեն անհրաժեշտ շինանյութեր: Ծավալուն վերականգնողական գործերը վերապահված են շինբրիգադներին: «Ամեն ինչ պետք է կատարվի արագ և որակով` ընդգծել է վարչապետը, միաժամանակ զգուշացնելով բոլորին զերծ մնալ շահադիտական ու անհիմն քայլերից»,-ասել է ԼՂՀ վարչապետը:

Նա ներկաներին զգուշացրել է նաև, որ, ըստ օդերևութաբանական տվյալների, մարտի 26-ին, հնարավոր է դարձյալ մոլեգնեն ուժեղ քամիներ, ուստի պետք է պատրաստ լինել տարերքի նոր տհաճ անակնկալներին: