Ձեր վստահելի աղբյուրը

«Ամբեր» շախմատի ուժեղագույնների առաջնության ավարտից մեկ տուր առաջ չեմպիոնի անունն արդեն հայտնի է: «Կորուս Չեսս 2008» գերառաջնության չեմպիոն, հայ գրոսմայստեր Լևոն Արոնյանը 10-րդ տուրում նվաճեց չեմպիոնի տիտղոսը: Հայ շախմատիստը այս տուրում հանդիպել է աշխարհի չեմպիոն ռուսաստանցի Վլադիմիր Կրամնիկի հետ: Երկու խաղաձևերում էլ ոչ ոքի է գրանցվել:

Այսիպիսով Արոնյանը վաստակելով 13.5 միավոր, իրեն հետապնդող Կրամնիկին 2.5 միավոր առավելությամբ ետևում է թողել՝ ապահովելով ուժեղագույնի կոչումը, քանի որ անկախ 11-րդ տուրի արդյունքներից հայ մարզիկին անցնելը կամ նույնիսկ հավասարվելը անհնար է: Լևոն Արոնյանը ուժեղագույնի տիտղոսը վաստակել է նաև «արագ» մրցաձևում՝ 2 միավորով առավելությամբ իր ետևում թողնելով ուկրաինացի գրոսմայստեր Վասիլի Իվանչուկին: «Կույր» մրցաձևում նույնպես, Լևոն Արոնյանը առաջատարների շարքում է՝ Կարմնիկի և նրա հայրենակից Մորոզևիչի հետ:

Այսպիսով, այժմ գործնականում պայքարը գնալու է երկրորդ հորիզոնականի համար: Երկրոդը լինելու հնարավորություն ունեն՝ ռուսաստանցի Կրամնիկը, բուլղարացի Տոպալովը, հունգարացի Լեկոն և նորվեգացի Կարլսենը: Նշյալ 4 շախմատիստները իրենց հաշվում ունեն 11-ական միավոր: Վերջին տուրում համեմատաբար թույլ մրցակից է բաժին ընկել աշխարհի չեմպիոն Կրամնիկին, որը իր ուժերը չափելու է Սերգեյ Կարյակինի հետ, ով 4 միավորով մրցաշարային աղյուսակի ստորին հատվածում է:

Հունգարացի գրոսմայստերը իր ուժերը կչափի Ամբերի չեմպիոն Արոնյանի հետ: Լեկոյի հնարավությունները հաղթելու մի կողմից քիչ է, մյուս կողմից՝ Արոնյանը գործնականում նվաճելով չեմպիոնի տիտղոսը հնարավոր է լուրջ դիմադրություն ցույց չտա: Պատանի գրոսմայստեր Մագնուս Կարլսենը այս տուրում հանդիպելու է Մորոզևիչի հետ, ով Կարյակինի նման, նույնքան միավորով մրցաշարային աղյուսակի ստորին հատվածում է: Կարլսենի հնարավորությունը հաղթանակ տոնելու՝ բավականին շատ է:

Դժվարին պայքար է սպասվում բուլղարացի Տոպալովին, ով իր ուժերը կչափի ուկրաինացի Իվանչուկի հետ: Վերջինս առաջնության ողջ ընթացքում կայուն խաղ է ցուցադրել, մի քանի անգամ հայտնվել է մրցաշարային աղյուսակի վերին հատվածում, ինչպես նաև լավ արդյունքներ է ցույց տալիս, մասնավորապես արագ խաղաձևում: Իվանչուկը այս մրցաձևում երկրորդն է:

Նշենք, որ որ Լևոն Արոնյանը վերջին երեք ուժեղագույնների մրցաշարերում՝ Կորուս-Չեսս, Մորելիա-Լինարես և հիմա էլ Ամբեր բարձրակարգ խաղ է ցուցադրում: Հիշեցնենք, որ նա Կորուս-ի չեմպիոն է, Լինարեսում նվաճել է երրորդ հորիզոնականը:
Արագ և կույր շախմատի ուժեղագույնների առաջնությունը մեկնարկել է մարտի 15-ին և կավարտվի այսօր: Այն աց է կացվում Ֆրանսիայի Նիսս քաղաքում: Առաջնության ընդհանուր մրցանակային հիմնադրամը 216 հազար եվրո է: