Ձեր վստահելի աղբյուրը

Հայաստանի նախաձեռնությամբ այսօր Ժնևում ՄԱԿ-ի Մարդու իրավունքների խորհուրդն ընդունել է ցեղասպանության կանխարգելման վերաբերյալ բանաձև: ԱԳՆ-ի մամուլի և տեղեկատվության վարչության հաղորդմամբ, այն ցեղասպանության կանխարգելմանն ուղղված` ՄԱԿ-ի մարդու իրավունքների համակարգում երբևէ ընդունված առաջին բանաձևն է:

Բանաձևը ցեղասպանությունների կանխարգելման ուղղությամբ ՄԱԿ-ում Հայաստանի նախկին նախաձեռնությունների շարունակությունն է և նպատակ ունի քննարկելու ՄԱԿ-ի համակարգում վաղ կանխարգելման խնդիրներով զբաղվող մեխանիզմների գործունեության ներդաշնակեցման, վաղ նախազգուշացման նշանների մշակման, ցեղասպանության կանխարգելման գործնական հարթության խնդիրներ:

Բանաձևի ընդունումը խորհրդանշական է այն առումով, որ այս տարի լրանում է Ցեղասպանության հանցագործության կանխարգելման և պատժման միջազգային կոնվենցիայի 60-ամյակը: Հայաստանի առաջարկով ՄԱԿ-ի համակարգում անցկացվելու են տարեդարձը նշող հոբելյանական միջոցառումներ:

ՄԱԿ-ի Մարդու իրավունքների խորհրդի նստաշրջանին Հայաստանի նախաձեռնությամբ հրավիրվել և ելույթ է ունեցել ՄԱԿ-ի Գլխավոր քարտուղարի կողմից ցեղասպանության կանխարգելման հարցերով հատուկ խորհրդական Ֆրենսիս Դենգը, որի հետ համագործակցությունն առանցքային է գնահատվում ցեղասպանության կանխարգելման հարցերով մտահոգ երկրների կողմից:

Բանաձևը ներկայացնելիս Հայաստանի մշտական ներկայացուցիչ, դեսպան Զոհրաբ Մնացականյանը նշել է, որ ցեղասպանությունների կանխարգելումը և այս բանաձևի ընդունումը վերստին ընդգծում է միջազգային հանրության բարոյական պատասխանատվությունը ցեղասպանությունների զոհերի հիշատակի առաջ:

Նույն աղբյուրի համաձայն, այս բանաձևը համահեղինակել են 58 պետություններ, այդ թվում` Եվրամիության բոլոր երկրները, Շվեյցարիան, Ավստրալիան, Արգենտինան, Բրազիլիան, Կանադան, Մեքսիկան, Նորվեգիան և այլոք:

Նշենք, որ ՄԱԿ-ի Մարդու իրավունքների խորհուրդը ստեղծվել է 2006թ-ին` փոխարինելով նախկինում գործող Մարդու իրավունքների հանձնաժողովին: Այն ՄԱԿ-ի համակարգում մարդու իրավունքների խրախուսման և պաշտպանությամբ զբաղվող հիմնական մարմինն է, որի անդամ են ՄԱԿ-ի 47 անդամ պետություններ երկրներ: 2002-2006թթ. ընթացքում հանդիսանալով ՄԱԿ-ի Մարդու իրավունքների հանձնաժողովի անդամ` Հայաստանը ներկայումս ՄԻԽ–ում ունի դիտորդի կարգավիճակ: