Ձեր վստահելի աղբյուրը

Գնահատման և թեստավորման կենտրոնն արդեն ամփոփել է այս տարի միասնական և ավարտական քննության մասնակիցների թիվը: Հայոց լեզու և գրականություն առարկայից միասնական քննություն է հանձնելու Հայաստանի և ԼՂՀ-ի 13,388 դիմորդ, որոնցից 4506-ը` Երևանում: Այս մասին Panorama.am-ի թղթակցի հետ զրույցում ասաց ԳԹԿ մամուլի քարտուղար Գայանե Մանուկյանը:

Նրա տեղեկացմամբ, այս թվերը դեռևս նախնական են, քանի որ դիմորդները հնարավորություն ունեն միչև ապրիլի 30-ը իրենց դիմում հայտում փոփոխություն կատարել: Նրա խոսքով, անցած տարի Երևանում հայոց լեզու և գրականություն առարկայից միասնական քննություն է հանձնել 5011 դիմորդ: «Այդ թիվն արդեն վկայում է, որ հայոց լեզու և գրականություն միասնական քննություն հանձնողների թիվն այս տարի նվազել է»,- հավելեց ԳԹԿ մամուլի քարտուղարը:

Գ. Մանուկյանը տեղեկացրեց, որ այս տարի Հայաստանից և ԼՂՀ-ից մաթեմատիկա առարկայից միասնական քննություն է հանձնելու 9672 դիմորդ, ռուսերեն առարկայից` 14041 դիմորդ, անգլերեն առարկայից` 7591 դիմորդ, գերմաներն առարկայից` 574 դիմորդ, ֆրանսերենից` 494 դիմորդ, իսպաներնից` 18 դիմորդ, իսկ իտալերենից` 3 դիմորդ:

Նա հայտնեց, որ այս տարի հայոց լեզու և գրականություն առարկայից ավարտական քննություն է հանձնելու Հայաստանի և ԼՂՀ-ի 35 հազար 946 շրջանավարտ, մաթեմատիկա առարկայից` 39 հազ. 421 շրջանավարտ, ռուսերեն առարկայից` 34 969 շրջանավարտ, անգլերեն առարկայից` 3510, գերմաներեն առարկայից` 423, իսկ ֆրանսերեն առարկայից 362 շրջանավարտ:

Նշենք, որ 2007-2008 թթ. դիմորդների և շրջանավարտների ավարտական և միասնական քննությունների մասնակցության դիմում-հայտերի ընդունումն ավարտվել է մարտի 17-ին: