Ձեր վստահելի աղբյուրը

Այսօրվա դրությամբ հանրապետության լճերում սիգի պաշարներն այնքան են կրճատվել, որ բնապահպանության նախարարությունը երկրորդ տարին անընդմեջ չի արտոնագրում դրա արդյունագործական որսը Սևանա լճում ու այս տարի ևս մեկ տարով ձկան որսն արգելում է: Այս մասին այսօրվա ասուլիսում ասաց բնապահպանության նախարարության կենսառեսուրսների կառավարման գործակալության, կենդանական ռեսուրսների կառավարման բաժնի պետ Կարեն Ճենտերեջյանը:

Ըստ նրա, անցյալ տարվա հաշվարկներով Սևանում սիգի քանակը եղել է 600 տոննա, մինչդեռ, երկու տարի առաջ գրանցված տվյալների համաձայն` այն հասել է 1000 տոննայի: Այս տարվա տվյալները, ըստ բաժնի պետի, դեռևս հայտնի չեն: «Ձկան արդյունագործական պաշարները 1998 թվականին եղել են 1800 տ, այս պայմաններում շատ բնական է, որ քանակը հետզհետե նվազում է»,-նշեց Կ. Ճենտերեջյանը: Նա միաժամանկ նշեց, որ անօրինական ձկնորսության դեմ պայքարը գնալով դժվարանում է: Դա հատկապես նկատվել էր լճի սառեցման ժամանակաշրջանում: «Այդ ժամանակ, տեսչական խմբի համար, որը հսկողությունն իրականացնում է փոքրիկ նավերով, հսկողությունն իրականացնելն ավելի դժվարացավ: Բայց պետք է նշեմ, որ վերջին օրերին վերահսկողական աշխատանքները կրկին շարունակվում են»,-ասաց նա:

Ապօրինի ձկնորսության հսկողության ակտիվացմանը զուգահեռ նախարարությունը մտադիր է նաև ձկների տեսակի ու քանակի ավելացման հետ կապված աշխատանքներ ևս կատարել: Նրա հավաստմամբ, այս տարի ուսումնասիրություններ են կատարվելու, և եթե դրանց արդյունքում պարզվի, որ Սևանա լճի սիգի պաշարներն այնքան են աճել, որ հնարավոր է վերականգնել արդյունագործական ձկնորսությունը, ապա կթույլատրվի շարունակել ձկնորսությունը:
Նշենք, որ մինչև Սևանի մակերեսի ինտենսիվ նվազումը, ձկան որսը տարեկան կազմում էր 600-1200 տոննա: