Ձեր վստահելի աղբյուրը

Հայաստանի արտգործնախարարության մամուլի և տեղեկատվության վարչության հաղորդմամբ, նորանշանակ Էդուարդ Նալբանդյանը հարցազրույց է տվել Մեդիամաքս գործակալությանը, որն ամբողջությամբ ներկայացնում ենք ստորև.

-Պարոն նախարար, նախ թույլ տվեք շնորհավորել Ձեզ այս բարձր պաշտոնը ստանձնելու կապակցությամբ: Ես շնորհակալ եմ, որ Ձեր պաշտոնավարման առաջին օրը ժամանակ գտաք մի քանի հարցի պատասխանելու:

-Անցյալ շաբաթ Հայաստանի դեսպանների հետ հանդիպման ժամանակ ՀՀ նախագահ Սերժ Սարգսյանը նշեց, որ Հայաստանի արտաքին քաղաքական ուղեգիծը շեշտակի փոփոխության չի ենթարկվելու, շարունակվելու է բարեկամ և գործընկեր երկրների հետ երկկողմ և բազմակողմ հարաբերությունների ավելի խորացումն ու ամրապնդումը, գործուն ներգրավվածությունը միջազգային կազմակերպություններում:

Ես չեմ կարծում, որ ձեր հարցերին տրվող պատասխանները պետք է դիտվեն որպես ծրագրային դրույթներ, սակայն պատրաստ եմ անդրադառնալու մի քանի առանցքային խնդիրների:

Սկսեմ, թերևս, մեր հիմնական գործընկերներից:

Ռուսաստանի հետ մեր առանձնահատուկ ռազմավարական գործընկերությունը բոլոր ուղղություններով կշարունակվի ամրապնդվել, հիմնվելով մեր ժողովուրդների ավանդական կապերի վրա:
Հայաստանը հետամուտ է լինելու ԱՄՆ հետ բարեկամական գործընկերության զարգացմանն ու խորացմանը և համագործակցության սերտացմանը:

Հայաստանը կշարունակի եվրոպական ընտանիքին մերձենալու իր հետևողական քայլերը` հենվելով եվրոպական կառույցների և կամակերպությունների հետ համագործակցության շրջանակներում մեր վրա վերցված պարտավորությունների և այն ընդհանուր արժեքների վրա, որոնք մենք կիսում ենք:

Հայաստանը կարևորում է կապերն այն անմիջական հարևան պետությունների հետ, որոնց հետ գործընկերությունը կրում է բարեկամական բնույթ և պատրաստ է ամեն ջանք գործադրելու` բարելավելու հարաբերություններն այն հարևանների հետ, ում հետ դեռ կան խնդիրներ:

Լեռնային Ղարաբաղի հիմնահարցի կարգավորումը մեր առաջնայնություններից է: Կցանկանայի վերահաստատել, որ Հայաստանը պատրաստ է շարունակելու առկա գործընթացը` լուծումը գտնելու համար: Սակայն միայն մեր պատրաստակամությունը բավարար չէ: Այդ լուծումը գտնելու համար անհրաժեշտ է նաև Անդրբեջանի պատրաստակամությունը:

Ես կցանկանայի հավատալ, որ Ադրբեջանի իմ գործընկերոջ հետ միասին մենք կցուցաբերենք պատասխանատու մոտեցում, մի կողմ դնելով մամուլի և հայտարարությունների միջոցով խոսելը և հրապարակայնորեն միմյանց դասեր և խորհուրդներ տալը:
Անհնար է փոխզիջման կոչեր անել և միաժամանակ հայտարարել, որ լուծումը կլինի միայն մի կողմի օգտին, խոսել կոմստրուկտիվիզմի մասին և դրա հետ մեկտեղ հնչեցնել ռազմատենչ հայտարարություններ և բացեիբաց պատերազմի պատրաստվել: Ինչու է դա արվում: Չեմ կարծում, որ աշխարհում կա մեկ այլ պետություն, որը պարծենում է իր ռազմական բյուջեն մի քանի անգամ ավելացնելու հանգամանքով:

Բանակցությունների առանցքը ԼՂ կարգավիճակի հարցն է, և այն պետք է լուծվի խաղաղ գործընթացի արդյունքում` պլեբիսցիտի միջոցով, որը ԼՂ բնակչությանը հնարավորություն կտա ազատ արտահայտելու իր կամքը, ինչն էլ բանակցային այս փուլի էությունն է: Կարծում եմ, որ լուծման հնարավորությունն այսօր առկա է, և քաղաքական կամքի դրսևորման դեպքում մենք կկարողանանք հասնել դրան:

- Պարոն նախարար, կարող եք մեկնաբանել հայ-թուրքական հարաբերությունների ներկա վիճակը և հեռանկարները:

- Թուրքիայի հետ հարաբերությունների հարցում մենք բազմիցս արտահայտել ենք առանց նախապայմանների հարաբերությունները կարգավորելու մեր պատրաստակամությունը: Ցեղասպանությունը մեր ընդհանուր պատմության սև էջն է, և մենք պետք է միասին շրջենք այդ էջը, միասին կառուցենք մեր ապահով ապագան:

Կցանկանայի ևս մեկ անգամ վերահաստատել առանց որևէ նախապայմանի հարաբերությունները զարգացնելու մեր պատրաստակամությունը: Հայաստանը կշարունակի համապատասխան քայլեր ձեռնարկել այդ ուղղությամբ:
Մեզ համար առաջնային կարևորություն է տարածաշրջանում կայունության և տևական խաղաղության հաստատումը և համագործակցության ծավալումը:

Ռազմավարական առումով, Հարավային Կովկասը կարևոր է ոչ միայն իր աշխարհագրական դիրքի և բնական հարուստ պաշարների առումով, այլ նաև այն բանի շնորհիվ, որ այստեղով են անցնում Հարավ-Հյուսիս և Արևելք-Արևմուտք կապող առանցքային ուղիները, որոնց լիարժեք օգտագործումը հնարավոր է միայն հակամարտությունների հաղթահարման և բարիդրացիական հարաբերությունների հաստատման միջոցով: Դրանից կշահեն բոլորը:

Հայաստանի Հանրապետությունը պատրաստ է գործադրել ամեն ջանք այդ օրը մոտեցնելու համար: