Ձեր վստահելի աղբյուրը

«Ամեն տարի ապրիլի 24-ին Հայաստանի հունական համայնքը այցելում է Ծիծեռնակաբերդի հուշահամալիր իր հարգանքի տուրքը մատուցելու 1915 թվականի հայոց եղեռնի զոհերի հիշատակին: Մենք նույն ճակատագիրն ունենք և շատ լավ ենք հասկանում այն ցավը, որ այսօր զգում են հայերը»,- Panorama.am-ի թղթակից հետ զրույցում նշեց Ծիծեռանակաբերդի հուշահամալիր այցելած Հայաստանի հույների «Պոնտի» համայնքի ղեկավար Ֆրոնտիկ Նիկոլաիդիսը: Նշենք, որ համայքի ներկայացուցիչներն իրենց ձեռքին կրում էին Հայաստանի ու Հունաստանի դրոշները:

Համայնքի ղեկավարի խոսքով, «պատմական Պոնտոսի հույները նույնպես ցեղասպանության են ենթարկվել 20-րդ դարի սկզբին և ինչպես հայերը նշում են ապրիլի 24-ը, այնպես էլ հույները նշում են մայիսի 19-ը, որպես հույների կոտորածների օր»: Նիկոլաիդիսը նշեց նաև, որ ամեն տարի մայիսի 19-ին Հայաստանի հույները այցելում են Ծիծեռնակաբերդի հուշահամալիր իրենց հարգանքի տուրքը մատուցում ցեղասպանության զոհ դարձած 350 հազար հույների անմեղ հիշատակին:

«Վաղ թե ուշ Թուրքիան ընդունելու է հայերի ու հույների ցեղասպանությունը, բայց մենք պետք է այնպես անենք, որ դա շուտ լինի»,- նշեց նա, հավելելով, որ եթե հայերի ցեղասպանությունը ճանաչվի, դա հույս կտա հույներին, որ իրենց նկատմամբ կիրառված ցեղասպանությունը նույնպես կարող է ճանաչվել:

Հարցին, թե ինչո՞վ է պայմանավորված, որ ի տարբերություն Հայաստանի, Հունաստանի արտաքին քաղաքականության օրակարգում դրված չէ Թուրքիայի կողմից իրենց նկատմամբ կատարված ցեղասպանության ճանաչման հարցը, Ֆ. Նիկոլաիդիսը պատասխանեց. «Հիմա Հունաստանում ավելի շատ քաղաքական շրջանակներ են խոսում դրա մասին, բայց դեռ նման հարց օրակարգում չկա: Ես հույս ունեմ, որ մի օր Հունաստանը նույնպես Պոնտոսի հույների ցեղասպանության հարցը կբարձրացնի և այն կճանաչվի»: