Ձեր վստահելի աղբյուրը

Նախածննդյան և ետծննդյան շրջանում մատուցված բուժծառայություններն անվճար են: Սա ամրագրված է հայաստանյան օրենսդրությամբ և փակցված գրեթե բոլոր համապատասխան ծառայություններ իրականացնող բուժհաստատությունների պատերին: Այս թեմայի մասին շատ է խոսվել մամուլում, բայց խնդրի վերաբերյալ ահազանգերն ու բողոքները շարունակվում են:

Ահազանգեր խնդրի վերաբերյալ Panorama.am-ի խմբագրությունը ևս ստանում է: Վերջինը նախօրեին էր: Անուն ազգանունով ներկայանալ չցանկացող քաղաքացին պատմեց, որ քաղաքապետարանի ենթակայության ներքո գործող «Սուրբ Աստվածամայր» ԲԿ-ում բոլոր անալիզների և մյուս ծառայությունների համար պահանջել են վճարել 500-ական դրամներ, հաշվառման անկետա բացելու համար` ևս 500 դրամ, ատամնաբույժին ու թերապևտին` կրկին 500-ական դրամներ, էխոյի համար` 3000 դրամ, բժշկի խորհրդատվության համար` 5000 դրամ, սակայն որևէ կտրոն վճարումների դիմաց չեն տրամադրել:

Հղի կնոջ պատմելով, ինքն առաջաին անգամ այցելելով կենտրոն, ընդհանուր առմամբ վճարել է մոտ 15 հազար դրամ, ինչից հետո նրան ստորագրելու համար մի թղթի կտոր են տվել, որտեղ ադմինիստրացիան հիշեցնում է, որ հղիության հետ կապված ծառայություններն անվճար են, դրանք երաշխավորված են պետության կողմից, իսկ բժիշկների մասնագիտական թերությունների մասին պետք է տեղյակ պահել ադմինստրացիային: Արդեն վճարումներ կատարած կինը թուղթը ստորագրել է` մտածելով, որ ինքը դեռ այցելելու է կենտրոն: Հենց նույն պատճառով էլ չհամաձայնեց անունը հրապարակել:

Panorama.am-ի թղթակցի հետ զրույցում առողջապահության նախարարի խորհրդական Ռուսլաննա Գևորգյանը նշեց, որ անանուն զանգերը որպես բողոք չեն գրանցվում իրենց մոտ` պատճառաբանելով, որ միգուցե ինչ-որ մեկն ուզում է որևէ բժշկի այդ կերպ վատություն անել: Նա նշեց, որ նման և այլ բողոքների համար գործում է թեժ գիծ` 52-88-72 հեռաոսահամարով: Ստացած զանգերի մասին, ըստ Ռ. Գևորգյանի, ամեն օր զեկուցվում է առողջապահության նախարարին, բողոքներին ընթացք տալու համար էլ կոորդինատոր է նշանակվել: Եվ քանի որ թեժ գծի կոորդինատորը նոր է նշանակվել, ապա վիճակագրական տվյալներ մեզ չտրամադրեցին, խոստանալով դա անել մեկ ամիս անց` դրանք ամփոփելուց հետո: