Ձեր վստահելի աղբյուրը

Նախորդ տարվա հոկտեմբերի 1-13-ը 6-27 տարեկան քաղաքացիների շրջանում կարմրուկի և կարմրախտի դեմ պատվաստումների իրականացման ընթացքի, դրա թերությունների ու հետևանքների վերաբերյալ հենց այդ ընթացքում Panorama.am-ը մոտ մեկ տասնյակ հրապարակումներ է ունեցել` ներկայացնելով բնակչության շրջանում առկա դժգոհություններն ու մասնագետների պարզաբանումները: Սակայն հարցն այսքանով չի փակվել: Դեռ ավելին, «գլխավոր» հետևանքները նոր են ի հայտ գալիս, մասնավորապես արդեն պատվաստված ու հետագայում հղիացած կանանց շրջանում:

Panorama.am-ին հայտնի են դեպքեր, երբ պատվաստված մի քանի կանայք ստիպված են եղել հղիության արհեստական ընդհատման դիմել, քանի որ նման խորհուրդ են տվել բժիշկները: Մեզ հայտնի դեպքերը մի քանիսն են, սակայն բոլորը չեն, որ ցանկացան իրենց անունները հրապարակել:  Լուսինե Հախվերդյանը Տավուշի մարզի Այրում քաղաքից է, ում հղիության 3-րդ ամսում բժիշկները, իմանալով, որ պատվաստվել է կարմրուկի և կարմարախտի դեմ, համապատասխան հետազոտություն կատարելուց հետո, խորհուրդ են տվել պտուղը հեռացնել` պատճառաբանելով, որ «նորմալ երեխա չի լինի»: Կանացից մեկն էլ պատմեց, որ երբ սկսել է հաճախել կոնսուլտացիաների, իրեն առաջին հերթին հարցրել են պատվաստված լինել-չլինելու մասին, ապա դրանից հետո հարցրել են, թե որերորդ ամսում է հղիացել, և կրկին խորհուրդ են տվել դիմել արհեստական ընդհատման:

«Բոլորս դեպի պատվաստումներ» կարգախոսն այդ օրերին փակցված էր քաղաքի գրեթե բոլոր փողոցներում: Հակացուցված լինելու մասին սկզբում ոչինչ չէր ասվում: Panorama.am-ի հրապարակումներից ու բազմաթիվ հարցադրումներից հետո  զգուշացրին, որ հղի կանանց հակացուցված է, ալերգիա ունեցողներին պետք չէ, գրիպի ու մրսածության դեպքում չարժե... Նույնիսկ հետո, երբ արդեն բազմաթիվ բողոքներ կային, որ մեծ թվով պատվաստվածներ վատ են տանում «բոլորս դեպի պատվաստումները», զգուշացումներ, թե ինչ ախտանիշեր են սպասվում և ինչ անել պատվաստումից հետո` չէր արվում:  

Վերադառնանք առավել ցավոտ կետին. ավելին,  այն պատվաստումների «մարաթոնի»ժամանակ առողջապահության նախարարության պաշտոնյաններն ու այդ կառույցի պատրաստած ուղեցույցներն ասում էին, եթե հղի կինը ստացել է պատվաստում, ապա դա ցուցում չէ հղիությունը դադարեցնելու համար:

Ինչևէ: Իմունականխարգելման ազգային ծրագրի ղեկավար Գայանե Սահակյանը Panorama.am-ի հետ զրույցում ասաց, որ առողջապահության նախարարությունը նման բողոքներ կամ ահազանգեր առայժմ չի ստացել, նշյալ խնդրի վերաբերյալ որևէ տեղեկատվություն չկա: Հնարավո՞ր է, որ պատվաստումը նման ազդեցություն ունենա հետագայում հղիացած կանանց վրա: «Ինչի՞ պետք է հնարավոր լինի»,-պատասխանեց Գ. Սահակյանը: Նրա խոսքով, վերապատրաստման ընթացքում բուժքույրերին տեղեկացրել են և ուղեցույցներում նշել են, որ պատվաստումից հետո ցանկալի է հղինալ նվազագույնը մեկ ամիս անց: «Բայց հիմնականում երկու այլ նկատառումով: Դա ոչ թե հղիի վրա կազդի, այլ… Առաջինը, որ կնոջ օրգանիզմը պատրաստ է հիվանդության դեմ պայքարել մեկ ամսվա ընթացքում` օրգանիզմում իմունային համակարգը զարգանում մեկ ամսում: Իսկ երկրորդը, որ եթե կինն այդ ընթացքում հանդիպի հիվանդի և վարակվի, ապա պաշտպանված լինի: Եթե պատվաստման սկզբնական ժամանակաշրջանում է կինը վարակվում, այդ դեպքում պատվաստանյութն ազդեցություն չի թողնում, ազդեցություն է ունենում բնական վիրուսը, այսինքն կինը վարակվում է: Որպեսզի հետո առաջ եկած բարդությունները չկապվեն պատվաստման հետ: Այս նկատառումներից ելնելով մենք կնոջը խորհուրդ ենք տվել մեկ ամիս սպասել, այնուհետ հղիանալ»,-ասաց Գ. Սահակյանը:

«Այսինքն, հետագա հնարավոր հղիության վրա բացասական ազդեցությունից խուսափելու նկատառում չի՞ եղել» հարցին ի պատասխան ծրագրի ղեկավարը ասաց. «Իհարկե` չէ, որովհետև դա թուլացված վակցինա է, արհեստական միջավայրում աճեցված վակցինա է, հենց դրանով էլ տարբերվում է բնական վիրուսից: Այն աղճատուն հատկանիշներից զուրկ է»:

Հիշեցնենք, որ մասնագետներից ոմանք պատվաստման նշանակությունը կարևորելիս հենց առաջինը մատնացույց էին անում հղի և ռեպրոդուկտիվ տարիքի կանանց և աղջիկներին, քանի որ, ըստ նրանց, կարմրախտն ու կարմրուկը, «կարող են բացասական հետևանքներ ունենալ դեռ չծնված երեխայի առողջության վրա, ինչպես նաև կնոջ մոտ կարող է բարդ խնդիրներ առաջացնել հղիության ընթացքում: Բացի այդ, եթե հղի կինը չպատվաստվի և հիվանդանա հղիության շրջանում, ապա հարկավոր կլինի արհեստական ընդհատում անել, քանի որ ռիսկը մեծ է, որ երեխան արատներով և թերություններով կծնվի»: Այժմ ճիշտ հակառակ պատկերն է ստացվել: Մեղավորներ կան, կպատժվե՞ն արդյոք:


Նաև հիշեցնենք, որ կարմրուկի և կարմրախտի դեմ պատվաստումներն իրականացման համար, ընդհանուր առմամբ, ծախսվել է 1 մլն 700 հազար դոլար: Պատվաստվել էր թիրախային խմբի 98 տոկոսը: Պաշտոնական տեղեկատվության համաձայն, հնդկական «Սերում» արտադրության պատվաստանյութերը գնվել են ՄԱԿ-ի մանկական հիմնադրամի կողմից: Պատվաստանյութերի պիտանելիության ժամկետը կլրանա միայն 2009 թվականին:

ՆԱԽՈՐԴԻՎ`

http://www.panorama.am/am/health/2007/08/15/patvastum/ `  ՉԻ ԿԱՐՈՂ ՊԱՏԱՀԵԼ. ԲՈԼՈ՞Ր 6- 27 ՏԱՐԵԿԱՆՆԵՐԸ ՊԵՏՔ Է ՊԱՏՎԱՍՏՎԵՆ

http://www.panorama.am/am/health/2007/09/28/patvastum/ ` ՏԱՐՕՐԻՆԱԿ «ԲՈԼՈՐՍ ԴԵՊԻ ՊԱՏՎԱՍՏՈՒՄՆԵՐ»

http://www.panorama.am/am/health/2007/09/29/hakacucum/` ՊԱՏՎԱՍՏՈՒՄՆԵՐԸ ՀԱԿԱՑՈՒՑՎԱԾ ԵՆ...

http://www.panorama.am/am/health/2007/10/06/patvastum/`  ԾՆՈՂՆԵՐ. «ԲԺԻՇԿՆԵՐԸ ԼԱՎ ՊԱՏՐԱՍՏՎԱԾ ՉԵՆ»

...

http://www.panorama.am/am/health/2007/11/07/patvastum/`

http://www.panorama.am/am/health/2007/10/16/patvastum/`