Ձեր վստահելի աղբյուրը

«ԱրմենՏել» ընկերության պատճառով բաժանորդների շրջանում առաջացած խնդիրների մասին այսօր Panorama.am-ը զրուցեց իրավաբան-փորձագետի հետ:

Նշենք, որ ԱրմենՏել» ընկերության` բիլլինգի նոր համակարգի անցնելու պատճառով հանրապետության տարածքում հետաձգվել է ֆիքսված հեռախոսակապի բաժանորդների մի մասի հեռախոսային հաշվի ներկայացումը: 2008 թվականի հունվար, փետրվար և մարտ ամիսներին բջջային հեռախոսահամարներին կատարած հեռախոսազանգերի մի մասը չի եկել բաժանորդի հաշվին և ներկայացվել է բաժանորդներին միայն ապրիլին: Ընկերությունից հայտնել էին, թե նշված ժամանակահատվածի հաշիվը բաժանորդները կարող են վճարել հաշիվը ստանալուց հետո երեք ամսվա ընթացքում: Բացի այդ այս օրերին բավականին շատ է այն քաղաքացիների թիվը, ովքեր բողոքում են «ԱրմենՏելի» կողմից հեռախոսային տարբեր ծառայությունների դիմաց իրենց ներկայացված աստղաբաշխական և կասկածելի ծագում ունեցող վարձավճարներից:

Այս կապակցությամբ մեր զրուցակից իրավաբանն ասաց. «Շարքային սպառողը վճարումներ կատարելիս հաճախ ղեկավարվում է իր քսակի պարունակությամբ, իսկ վճարումներից հետո մնացած գումարը կարող է ծախսել իր հայեցողությամբ, որից հետո նրան ուշացումով հաշիվ ներկայացնելու դեպքում սպառողն այլևս պատասխանատվություն չի կրում»: Ըստ մասնագետի, սա գրեթե նույնն է, երբ գործատուն սխալմամբ ավել աշխատավարձ է վճարում և համաձայն օրենքի իրավունք չունի ետ պահանջել: «Բարի լիներ չսխալվեր»,-ասաց փորձագետը:

Ավելին, մեր զրուցակիցը կարծում է, որ «ԱրմենՏելը պետք է վնաս կրի: Եթե նույնիսկ ֆիզիկական անձը վնասը կրի, նա կարող է վնասի փոխհատուցման հայց ներկայացնել: Բոլոր դեպքերում «ԱրմենՏել»-ը պետք է իր աշխատանքը կատարելագործի, որովհետև բոլորին հայտնի է, որ պատմականորեն եկել են մեծ և չհիմնավորված հաշիվներ»:
Փորձագետը այս իրավիճակը նմանեցնում է խանութում թերակշռումների և մանրի սխալ վերադարձնելու հետ, երբ ասում են կներեք սխալվեցի և դրանով ամեն ինչ վերջանում է ու ոչ մի վնաս էլ չեն կրում:

««ԱրմենՏել»-ն ասում է կներեք և շարունակում ներկայացնել սխալ հաշիվներ: Տպավորություն է ստեղծվում, որ դա պատահական զուգադիպություն չէ, ստացվում է, որ դա այդ ընկերության քաղաքականությունն է»,-նշում է մասնագետը:
Նրա խոսքով, սխալվել կարող են բոլորը, հարցը դրանում չէ, հարցը նրանում է, թե ինչպես է սխալը ուղղվում, ընկերությունը պատասխանատվությունը, ռիսկը վերցնո՞ւմ է իր վրա, թե շարունակում կրկնել իր սխալը:

Նշենք, որ «Վիմպելկոմ» ԲԲԸ դուստր ձեռնարկություն՝ «ԱրմենՏել» ՓԲԸ-ն կապի իր ծառայություններն մատուցում է Beeline ապրանքանիշով:

Հիշեցնենք, որ վերջերս հայտարարել էին, թե. «Այնպիսի խոշոր կազմակերպության մուտքը Beeline ապրանքանիշով գործող ընկերությունների խումբ, ինչպիսին ԱրմենՏելն է, զգալիորեն կամրապնդի Վիմպելկոմի միջազգային ապրանքանիշի դիրքերը և դա կարևոր քայլ է սպասարկման ոլորտում համաշխարհային մակարդակի առաջատար ընկերություն դառնալու ճանապարհին»: