Ձեր վստահելի աղբյուրը

«Երևան» քրեակատարողական հիմնարկում գտնվող «Նոր ժամանակներ» կուսակցության նախագահ Արամ Կարապետյանին անհապաղ պետք է տեղափոխել սրտաբանական մասնագիտացված կենտրոն, քանի որ նրա վիճակը տվյալ պահին գնահատվում է վատ: Այսօրվա ասուլիսում այս մասին ասաց Հերացու անվան պետական բժշկական համալսարանի ներքին հիվանդությունների ամբիոնի դոցենտ, «Էրեբունի» բժշկական կենտրոնի թերապևտիկ կլինիկայի սրտաբան Արմեն Գասպարյանը, ով կալանավորվածի հարազատների խնդրանքով նախօրեին զննել է հիվանդին:

«Երեկ 11.00-ի սահմաններում ես զննեցի սրտանոթային բարձր ռիսկի պայմաններում գտնվող Արամ Կարապետյանին: Էլետրասրտագրություն անցկացնելուց հետո հայտնաբերեցի սրտի միջնապատի սնուցման խանգարում, որը 44 տարեկան տղամարդու համար շատ վտանգավոր է, նաև սրտի սնուցման խանգարում հետին պատին»,-ասաց Ա. Գասպարյանը:

Բժշկի խոսքով, պարզվել է, որ հիվանդը մի քանի շաբաթվա ընթացքում նիհարել է 6.5 կգ-ով, ինչը վկայում է նյութափոխանակության խանգարման մասին: «Նյութափոխանակության խանգարումը շատ վտանգավոր է, քանի որ ես նրա մոտ նկատեցի նաև բարձր զարկերակային հիպերտենզիա, որը վկայում է, որ հիվանդի մոտ բազմակի անգամ բարձր է սրտանոթային ռիսկի գործոնները»,-նկատեց բժիշկը՝ ավելացնելով, որ հիվանդի մոտ նկատվել է հիմնական պսակային զարկերակի նեղացում, որը սնուցում է սրտի միջնապատը:

Ըստ մասնագետի, զարկերակային հիպերտենզիան, նյութափոխանակության խանգարումը մի քանի անգամ բարձրացնում են ինսուլտի, սրտամկանի ինֆարկտի և սրտանոթային մահացության վտանգը: Հիվանդի մոտ նկատվել են այլ ախտանիշներ՝ ընկճվածություն, գունատություն, որը, բժշկի խոսքով, այսօր հողագույն երանգ է ստացել, ձեռքերի սառնություն, գլխապտույտ և այլն:

Սրտաբան Ա. Գասպարյանը բացառում է դեղորայքային բուժումը: «Վերջին օրերին դեղորայքային բուժման ֆոնի վրա հիվանդը երկու անգամ կրիզ է տարել: Առավոտյան նրա մոտ զարկերակային ճնշման ստորին թիվը 120-ի մակարդակի է եղել: Ցանկացած կրիզի, ճնշման բարձրացման դեպքում կարող է լինել սրտանոթային մահացություն»,-նկատեց բանախոսը:

Բժշկի խոսքով, վտանգավոր է նաև այն հանգամանքը, որ Ա. Կարապետյանի ընտանիքում և ազգակիցների շրջանում եղել են սրտանոթային հիվանդություններից մահացության դեպք, սրտանոթի ինֆարկտի, շաքարի հանդեպտոլերանդության խանգարման դեպքեր:
Նշենք, որ սրտաբանի կարծիքին համաձայն չի եղել քրեակատարողական հիմնարկի բժիշկը՝ թերապևտ-սրտաբանը, ում կարծիքով կարելի է և Ա. Կարապետյանի դեպքում դեղորայքային բուժում կիրառել: