Ձեր վստահելի աղբյուրը

Յուրաքանչյուր տարի 11-րդ դասարանցի այն աշակերտները, ովքեր ԲՈՒՀ ընդունվելու համար պարապում են դասախոսների մոտ` կանգնում են խնդրի առջև:

Հին պատմություն է` երբ պարզվում է, որ տվյալ առարկան ԲՈՒՀ ընդունվելու համար ՍԵՓԱԿԱՆ աշակերտը պարապում է ՈՒՐԻՇԻ մոտ… աշակերտը կանգնում է երկու քարի արանքում:

Չարբախի թիվ 52 դպրոցի մի խումբ աշակերտներ բողոքում էին, որ իրենց դասավանդող ուսուցիչներից «այդ թեմայով» սկսել են հակամարտել երեխաների հետ. կշտամբում են, ցածր գնահատում…

Աշակերտներից մեկը պատմեց, որ իր ուսուցիչը սկսել է ցածր գնահատել այդ պատճառով, իսկ մինչ այդ բարձր գնահատական էր դնում:

«Ես առաջին դասարանից գերազանցիկ եմ եղել միչև 10-րդ դասարան: Այս տարի իմ ուսուցչի պատճառով կզրկվեմ  գերազանցիկությունից: Ինչի համար էր պետք իմ լավ սովորելը, որ գերազանցիկ չպետք է ավարտեմ»,- տարակուսում էր «դպրոցական բովերում» չբովված աշակերտը:

Մտքին, թե «իմացողին հնարավոր չէ ցածր գնահատել»... այս անգամ էլ նա ինձ միամիտի տեղ դրեց:

Պարզելու համար, թե երեխան ինչպես կարող է ապացուցել իր գնահատականը մինչև վկայական ստանալը, Panorama.am-ը դիմեց ԿԳՆ հանրակրթության վարչության պետ Նարինե Հովհաննիսյանին:

Վերջինս պատրաստակամություն հայտնեց զանգել- միջամտել, բայց մենք, հասկանալով, որ հարցը նման ձևով լուծելու համար հազարավոր հեռախոսազանգեր պետք կլինեն, խնդրեցինք ծանոթացնել մեզ ընթացակարգին:

«Երեխայի հանդեպ ուսուցչի կողմից ճնշման դեպքում ծնողը պետք է դիմի դպրոցի տնօրենին: Տնօրենը պետք է հանձնաժողով հրավիրի, որն էլ պետք է ստուգի երեխայի գնահատականները: Սխալ գնահատող ուսուցիչը կպատժվի (ինչպե՞ս): Այդ դեպքում երեխան կարող է իր ավարտական վկայականում ունենալ բարձր գնահատական»,-բացատրեց նա:

Panorama.am-ի հարցին, թե արդյոք կա՞ն երեխայի գիտելիքների գնահատման չափորոշիչներ, որպեսզի երեխան կարողանա ինքն իրեն գնահատել ու վերահսկել իր գիտելիքները, գնալ նման` իր համար կտրուկ քայլի, պարզվեց, որ… ՈՉ: Այս հարցին ի պատասխան Ն. Հովհաննիսյանը նշեց, որ «երեխայի գիտելիքները հնարավոր է ստուգել գրավորի միջոցով»:

Կախարդական շրջանակի մեջ չընկնելու համար չհարցրեցինք, թե «իսկ գրավո՞րը ոնց պետք է ստուգվի առանց չափորոշիչի»: Դեռ մի շրջանակ էլ կա` երեխային բացատրել, որ իր վիճակից «ելքը նույն դպրոցի տնօրենին դիմելն է…»: Կհասկանա՞, կամ կհավատա՞:

Միգուցե իրոք լավ կլիներ, որ ԿԳՆ հանրակրթության վարչության պետ Ն. Հովհաննիսյանը զանգահարեր ու խոսեր տնօրենի հետ: Գոնե մեկի հարցը կլուծվեր: