Ձեր վստահելի աղբյուրը

Օրեր առաջ Երևանի Հարավ-Արևմտյան Բ-1 թաղամասի բնակիչներից ջերմությամբ ուղեկցվող անհայտ ծագումնաբանության յոթ հիվանդներ հոսպիտալացվել էին: Շրջանառվող լուրերի համաձայն, թաղամասի ջրամբարի մեջ սատկած շուն է հայտնաբերվել, ինչն էլ հանդիսացել է վարակի տարածման աղբյուրը: «Երևան-Ջուր»-ից մեզ հայտնեցին, որ նմանատիպ լուրերը չեն համապատասխանում իրականությանը:

Առողջապահության նախարարության տեղեկատվության համաձայն հիվանդների կլինիկադիագնոստիկ և լաբորատոր հետազոտությունների արդյունքում, հիվանդներից երկուսի մոտ հաստատվել է որովայնային տիֆ հիվանդություն: Ինչպես Panorama.am-ի թղթակցի հետ զրույցում նշեց պետական և հիգիենիկ հակահամաճարակային հսկողության տեսչության պետի տեղակալ Ղազարոս Հակոբյանը, այդ հիվանդներից երեքն արդեն դուրս են գրվել, իսկ մյուս երկու հիվանդների ախտորոշման նպատակով հետազոտությունները դեռևս ավարտված չեն: «Ձեռնարկվող կանխարգելիչ միջոցառումներն ընթացքի մեջ են և վարակի աղբյուրը դեռ հայտնաբերված չէ»,-ասաց Ղ. Հակոբյանը: Նա նաև տեղեկացրեց, որ թաղամասի ջրամատակարարման և կոյուղու համակարգի սանիտարատեխնիկական վիճակի նկատմամբ հսկողությունն ուժեղացվել է և վարակվելու նոր դեպքեր չեն գրանցվել:

Ավելացնենք, որ հիվանդների հետ շփված անձիք ենթարկվում են կանխարգելիչ լաբորատոր հետազոտության, որի ժամանակ մանրէակրություն չի հայտնաբերվել: Ինչպես վստահեցնում են պատասխանատուները, իրավիճակը վերահսկելի է, վարակի աղբյուրը դեռ ճշտված չէ: