Ձեր վստահելի աղբյուրը

Երեկ Հայաստանի առաջադիմական կուսակցության նախագահ Տիգրան Ուրիխանյանի և «Հելսինկյան ասոցիացիա»-ի նախագահ Միքայել Դանիելյանի միջև տեղի ունեցած միջադեպի մասին այսօր Panorama.am –ին մանրամասներ փոխանցեց Հայաստանի առաջադիմական կուսակցության նախագահ Տիգրան Ուրիխանյանը:

Կուսակցության ղեկավարի խոսքով, արդեն մամուլում շրջանառվում են իրականության հետ կապ չունեցող տեղեկություններ և փորձ է արվում իր արարքը ներկայացնել որպես ծանրացուցիչ հանգամանքներում խուլիգանական արարք: Տիգրան Ուրիխանյանն, իր բնորոշմամբ` այդ սուտ տեղեկություններին, պատասխան չի տալու, պարզապես ցանկանում է ներկայացնել իրական փաստերը:

Ինչպես մեզ հետ զրույցում պատմեց ՀԱԿ ղեկավարը, նա ժամը 15-ի սահմաններում ծառայողական մեքենայով Տերյան փողոցով երթևեկելիս դիմացից ընթացող տաքսի ավտոմեքենայում նկատել է 2 պատուհաններից կիսադուրսպրծած երկու անձնավորության, որոնք բարձրաձայն անբարո արտահայտություններ են արել անցորդ աղջիկներին: Տաքսու ուղևորներից մեկն էլ, ըստ Տ. Ուրիխանյանի, նույնիսկ ձեռքը պարզել է դեպի աղջիկները: «Ես այդ տեսարանից հետո մեքենայից ազդանշան տվեցի` դիտողության կարգով, շրջանցեցի այդ մեքենան և անցա: 2 խաչմերուկ անց տաքսին եկավ մեր հետևից և հայելու մեջ տեսնում էինք, թե ինչպես են մեքենայի մեջից հայհոյական և մեքենան կանգնեցնելու մասին ժեստեր անում: Մեքենան կանգնեցրեցինք և դուրս եկա մոտեցա ու ճանաչեցի` իր պրովոկացիոն գործերով, երկիրն ապակայունացնելու գործում ջանք չխնայող հայտնի այդ անձնավորությանը: Փորձեցի ավելի զուսպ լինել, բայց նա սկսեց բղավել. հաբրգել եք արա, ձեր բոլորի…..»,-պատմեց Հայաստանի Առաջադիմական կուսակցության նախագահը:

«Հելսինկյան ասոցիացիա»-ի նախագահ Միքայել Դանիելյանը մեքենայից իջել ու անմիջապես ինչ որ առարկայով հարվածել է Տ.Ուրիխանյանին: Վերջինն էլ իրեն օրինական կարգով ամրագրված գազային ատրճանակից, առանց գնդակի կրակոց է արձակել օդ»,-այսպես ներկայացրեց Տ. Ուրիխանյանը:  Նրա խոսքով, եթե նույնիսկ կրակած էլ լիներ Մ. Դանիելյանի ուղղությամբ, ապա չէր կարող որևէ բան պատահեր, քանի որ ատրճանակը լիցքավորված չի եղել, այն ինչ, ըստ նրա, լուրեր են տարածվել, թե կրակոցից բեկորային վնասվածքներ է ստացել Դանիելյանը:

Տիգրան Ուրիխանյանն ասում է, որ ինքն անձամբ է զանգահարել ոստիկանություն և հայտնել միջադեպի մասին, իսկ Միքայել Դանիելյանն այդ ժամանակ  բղավել. «մենթերին ես զանգում արա, սաղ երկիրը մենթա, սաղիդ …..»:

Ի դեպ, Հայաստանի առաջադիմական կուսակցության ղեկավարը տեղեկացրեց, որ անցկացվել է ալկոհոլի աստիճանը ստուգող փորձաքննություն և պարզվել է, որ «Հելսինկյան ասոցիացիա»-ի նախագահը չափից շատ խմած է եղել և դա արձանագրվել է փաստերով: Ուրիխանյանը նաև կասկածներ ունի, որ նրանք նաև թմրանյութ են օգտագործել և պահանջել է նաև այդ կապակցությամբ փորձաքննություն անցկացնել:

Կուսակցության նախագահը վստահեցնում է, որ մինչև ժամը 24-1-ը երկու կողմն էլ ոստիկանության բաժանմունքում են եղել և խոսակցությունները, թե Ուրիխանյանն ավելի շուտ է գնացել` իրական չէ:

Օգտվելով ընձեռված հնարավորությունից Տիգրան Ուրիխանյանը խնդրեց միջադեպի մասնակից աղջիկներին ներկայանալ ոստիկանություն և աջակցել ճշմարտությունը բացահայտելուն: Իսկ իր արարքը նա ցանկանում է, որ դիտվի ոչ թե կուսակցության ղեկավարի, այլ առաջին հերթին, որպես հայ տղամարդու արարք:

«7 տարի պայքարել եմ Հանրապետությունում կայունության ու աստիճանական զարգացման համար ու այսօր, ցավով եմ նշում, որ երկրում ստեղծվել է այնպիսի վիճակ, որ արտասահմանից ֆինանսավորվող, սեռական փոքրամասնությունների շահերը պաշտպանող, ականջողավոր ու պոչիկավոր կիսատղամարդը կարողանում է ձեռք տալ կամ լկտիություններ տեղալ հայ ուսանողուհիների հասցեին ու դրանից հետո լկտիաբար հարբած հայհոյել իրեն դիտողություն անող մարդուն»,-ավելացրեց Հայաստանի առաջադիմական կուսակցության նախագահ Տիգրան Ուրիխանյանը:

Նշենք, որ գործը ստացել է օրինական ընթացք և հարուցված է քրեական գործ: