Ձեր վստահելի աղբյուրը

Հայաստանի ֆինանսա-բանկային համակարգը տարածաշրջանային ֆինանսական կենտրոն դառնալու իրական ներուժ ունի: Այսօր Դիլիջանում մեկնարկած ֆինանսա-բանկային առաջին կոնֆերանսի ժամանակ իր բացման խոսքում այսպես է հայտարարել է Հայաստանի նախագահ Սերժ Սարգսյանը:

Նրա խոսքով, ինքը հավատում է այդ հեռանկարին և վստահ է, որ հենց դա պետք է դառնա առաջիկա տարիների աշխատանքի հիմնական ուղղությունը: Նախագահի կարծիքով, անհրաժեշտ է աշխատել երկրի առավելությունների ավելացման վրա և Հայաստանում ցանկացած նորարարություն մտցնելու հարցում լինել ագրեսիվ:

«Մենք երկիր կբերեք միջազգային փորձը և ֆինանսական շուկայում ծառայությունների մատուցման ժամանակակից մեթոդներ` այդպիսով ձևավորելով ավանդույթներ»,- ասաց Սերժ Սարգսյանը: Այդ իմաստով նա դրական գնահատեց Ստոկհոլմի բորսայի մտնելը Հայաստանի ֆոնդային շուկա` հավելելով, որ անհրաժեշտ է շարունակել նմանատիպ ազդեցիկ քայլերի իրականացումը:

Նախագահի խոսքով, այսուհետ մեր երկրի ֆինանսա-բանկային համակարգի զարգացման տեմպերի գնահատականի համար երկրի նախագահը ոլորտի պատասխանատուներից պահանջելու է համեմատություն ոչ թե տարածաշրջանի երկրների հետ, այլև` պահանջելու է փաստեր առ այն, թե որքանով է մեր ֆինանսական համակարգը մոտեցել միջազգային չափանիշներին:

Նախագահի խոսքով, ֆինանսա-բանկային համակարգի զարգացումը կարող է դառնալ տնտեսության բոլոր ճյուղերի զարգացման «լոկոմոտիվ», ինչպես նաև կարող է առաջատար դեր ունենալ շատ ոլորտներում նորարարությունների կիրառման հարցում:

Նախագահը հատուկ ուշադրություն հրավիրեց ֆինանսա-բանկային ոլորտում վստահության մթնոլորտի ձևավորմանը: Սերժ Սարգսյանը վստահություն հայտնեց, որ արագ աճող ֆինանսական ոլորտը կարող է այդ մշակույթը տարածել այլ ոլորտների վրա ևս: «Մենք շուտքվ կհասնենք այն իրավիճակին, երբ տնտեսվարող սուբյեկտները ավելի հակված կլինեն վստահելու, և այդ գործոնը տնտեսական հարաբերություններում ավելի ուժեղ կլինի, քան` պայմանագրա-իրավական ինստիտուտը»,- հայտարարեց նախագահը:

Միևնույն ժամանակ նա ընդգծեց, որ իր զարգացման ճանապարհին ֆինանսական ոլորտը պետք է լուծի մեկ այլ հարց ևս, մասնավորապես` Հայաստանի բոլոր մարզերի հավասար զարգացումը: «Երկրի յուրաքանչյուր բնակիչ պետք է իր վրա զգա տնտեսական աճը»,- նշեց երկրի ղեկավարը: Սերժ Սարգսյանի խոսքով, մենք չենք կարող խոսել բոլոր տարածքների համահավասար զարգացման մասին, եթե այնտեղ իրապես ներկայացված չլինի ֆինանսա-բանկային համակարգը: Այդ իմաստով նախագահը բարձր գնահատեց Կենտրոնական բանկի ջանքերը, որի առաջին արդյունքներն արդեն իսկ նկատելի են: