ԵՐԵՎԱՆՅԱՆ ՆԵՐԿԱ ԿԱՏԱՍՏՐՈՖԻԿ ԵՐԹԵՎԵԿՈՒԹՅԱՆ ԱՊԱԳԱՆ

Հասարակություն 17:00 30/05/2008

ԵՐԵՎԱՆՅԱՆ ՆԵՐԿԱ ԿԱՏԱՍՏՐՈՖԻԿ ԵՐԹԵՎԵԿՈՒԹՅԱՆ ԱՊԱԳԱՆ

Հեղինակ` Հարցազրույցը վարեց Լալա ՏԵՐ-ՂԱԶԱՐՅԱՆԸ

Հարցազրույց «Երևանտրանս» ՓԲԸ տնօրեն Կարեն Եդիգարյանի հետ:

-Այսօր քանի՞ ընկերություն է սպասարկում մայրաքաղաքի երթուղային ցանցը:

-Ներկայում մայրաքաղաքում գործում է 125 միկրոավտուբուսային երթուղի, որը սպասարակում է 65 ընկերություն, 46 ավտոբուսային երթուղի` 12 ընկերություն, 8 տրոլեյբուսային երթուղի, որը սպասարկում է «Էլեկտրոտրանսպորտ» ՓԲԸ-ն և մետրոպոլիտենը: Բոլորը տեղական ընկերություններ են:

-Պայմանագիր կնքած ընկերությունների հետ հստակեցվո՞ւմ են աշխատանքային ժամերը, քանի որ հաճախ ժամը 20-21:00-ից հետո որոշ երթուղիներ չեն աշխատում:

-Աշխատանքային ժամերը մենք չենք հստակեցնում: Դրանք տնտեսվարող սուբյեկտի և աշխատողի ներքին աշխատանքային հարաբերություններն են: Տնտեսվարող սուբյեկտը մրցույթին մասնակցելիս պետք է բավարարի մրցութային կետերի որոշակի պահանջների` ապահովված լինի համապատասխան շարժակազմով, սպասարկման բազայով` մեխանիկներ, սպասարկող անձնակազմ, բժիշկ: Արդեն այն հարցը, թե ինչ աշխատանքային պայմաններ ունի տնտեսվարողն իր վարորդի հետ, մեզ հետ կապված չէ:

Երեկոյան ժամերին երթուղիները ոչ թե չեն աշխատում, այլ զգալիորեն նվազում են: Դա այժմ կապված է վարորդների պակասության հետ: Մեքնենաները կան, բայց սպասարկող անձնակազմ չկա: Բայց մենք տրանսպորտի զարգացմանն ուղղված երթուղային նոր ցանց ենք մշակել, որը քաղաքապետը կհաստատի առաջիկա տասն օրերի ընթացքում: Դրանով նախատեսվում է 1500-1600 միկրովատուբուսի կրճատում, ինչի արդյունքում մոտ 35 երթուղի կփակվի, մյուսների մոտ կլինի շարժակազմի պակասեցում: Բնականաբար կունենանք վարորդների մեծ հոսք, մի խոսքով, այդ հարցը կկարգավորվի: Միկրոովտոբուսների կրճատումը կլինի փոքր, միջին և մեծ տարողությամբ ավտոբուսների ավելացման հաշվին: Մենք պետական ավտոբուսային պարկը բաժանեցինք մասնավորի կազմակերպությունների միջև, պայմանով, որ ավտոբուսային տրանսպորտի զարգացումը վերցնում են իրենց վրա: Մինչև 2007-ի վերջը 72 ավտոբուս ներկրվեց մասնավորի կողմից, նրանք պետք է շարունակեն ավտոբուսների ներկրումը:

2008-2010 թթ. նոր ցանցում հստակ գրված է, թե այսինչ միկրովատուբուսային երթուղու փակումից հետո որ ավտոբուսային երթուղին է շահագործման հանձնվելու: Այսինքն, մենք միանգամից համարժեք քայլեր ենք ձեռնարկում` բնակչությանը փաստի առթիվ չկանգնցնելու համար: Ծրագիրը շարունակական է լինելու, և մենք երկու տարվա ընթացքում պետք է ներկրենք 550-600 ավտոբուսներ:

Շարունակվելու է նաև տրոլեյբուսների ներկրումը: Նախորդ տարի բերել ենք 20, այս տարի ևս կբերվի 20 տրոլեյբուս: 2007-2012 թթ. տրանսպորտի զարգացման ծրագրով նախատեսվում է տարեկան 20 տրոլեյբուս է ներկրել: Բարեփոխումների և զարգացման փուլում է նաև մետրոն, ինչի համար հսկայական գումարներ են հատկացվել: Ներկա պայմաններում մետրոյի ծանրաբեռնվածությունն ավելացել է 20-22 տոկոսով:

-Ըստ Ձեզ, ի՞նչը բերեց ոլորտի այսչափ վատացմանը:

-Այս դաշտում 2005-ից հետո կատարվել են զգալի փոփոխություններ: 2005-ին մենք չունեին տաքսու մեծ պարկ Երևանում, իսկ այսօր ունենք պաշտոնապես գրանցված 5500 տաքսիներ, իսկ ճանապարհային ոստիկանության տվյալներով, դրանց թիվը գերազանցում է 23 հազարը: Հիմա տրանսպորտի նախարարությունը դրանց գրանցման գործընթացն է սկսել, դեռ հստակ չէ, թե դրանից հետո քանիսը կմնան:
Մենք մաքսային մարմնից ստանում մենք տվյալներ, որ յուրաքանչյուր տարի 30-35 հազար մարդատար մեքենա է ներկրվում Հայաստան, ինչը ևս մեծ ազդեցություն է ունենում երթևեկության վրա:

Այս վիճակը, որ գոյություն ունի հիմա մայրաքաղաքում, չի գոհացնում ոչ բնակչությանը, ոչ էլ նամանավանդ մեզ: Սա մի քաոսային, կատաստորֆիկ վիճակ է: Մշակված նոր ցանցը լուրջ գործընթաց է, դրանով մեծ փոփոխություններ են նախատեսվում, ողջ քաղաքային ցանցում տրանսպորտային նոր մոտեցումներ են սպասվում: Մենք չենք ունենալու երթուղիներ, որոնք քարավանի պես պետք է իրար հետևից շարժվեն, մենք չեն ունենալու այսքան շարժակազմ, մենք ունենալու ենք փոքր, միջին և մեծ տարողությամբ ավտոբուսներ, մետրոն բերենք հասցնենք վերջին կանգառներին, գնալով նմանվենք քաղաքակիրթ երկրի: Ուրիշ այլընտրանք չունենք: Մենք բոլոր միկրոավտոբուսային երթուղիները սպասարկող կազմակերպություններին զգուշացրել ենք նոր խոշոր ներդրումներ չանել մինչև նոր ցանցի հաստատումը, որպեսզի հետագայում փաստի առջև ոչ ոք չկանգնի: Դրա փոխարեն խորհուրդ ենք տվել ներդրումներ կատարել ավտոբուսային երթուղիներում:

Ցանցի մշակման ընթացքում հաշվի ենք առել թաղապետերի, պատգամավորների ստացած, հասարակության բողոքները, մեզ հասցեագրված դիմումները, բոլորը, բոլորը, քանի որ հետագայում, ճիշտն ասած, մենք այլևս չենք ուզում անդրադառնալ այդ խնդրին, ինչ-որ մեկի խնդրանքով կամ պահանջով երթուղին երկարացնել կամ կրճատել, մենք հնարավորինս փորձում ենք 15 տարվա շուկան նորմալացնել և բերել համպարփակ տեսքի: 2011-ից հետո ի՞նչ կունենաք, չգիտեմ, բայց դրանով հեշտ կլինի հետո ուղղորդվել, ներկայիս մեր բազան կատաստրոֆիկ վիճակում է, որակից խոսելն էլ սուտ կլինի` ունենք հսկայական պարկ, չունենք վարորդներ, ունենք աժիոտաժ, գների թանկացում, սպասարկող կազմակերպություններն էլ են ցայտնոտի մեջ: Սա հապճեպ լուծելու հարց է:

-Այսօր ոլորտի ցավոտ խնդիրներից մեկն էլ խցանումներն են: Ճանապարհային ոստիկանությունը մեղադրում է քաղաքապետարանին, քաղաքապետն էլ խիստ հանձնարարական է տալիս ճանապարհային ոստիկանությանը…

-Ասեմ Ձեզ: Ճանապարհային ոստիկանությունը քաղաքապետին մեղադրելու իրավունք չունի, քանի որ հիմա քաղաքաշինական մեծ ծրագրեր են ընթանում: Եթե վախենանք խցանումներից, ապա ոչ մի բարեփոխում չպետք է արվի: Մենք կառուցում ենք շրջանցիկ ճանապարհներ, ուրեմն ճանապարհային ոստիկանության գործը շուտով` 2008-ի վերջին 2009-ի սկզբին կբեռնաթափվի 50-60 տոկոսով: Քաղաքապետարանը կառուցում է շրջանցիկ ճանապարհներ` փոքրիկ կենտրոնը բեռնաթափելու համար: Եթե դադարեցնենք շինարարությունը, ապա մեկ տարի անց կանգնելու էինք ավելի կատաստրոֆիկ վիճակի առջև: Օր առաջ շրջանցիկ ճանապարհների հարցը պետք է լուծվի:

Սրանք խցանումներ չեն, այլ դանդաղ ընթացք: Եթե այդ տեղում 5 րոպե աշխատի ճանապարհային ոստիկանության տեսուչը, ապա մեքենաները կսկսեն շարժվել, դրանք խցանումներ չեն, խցանումները Մոսկվայում են, Մադրիդում, Նյու Յորքում որտեղ ստիպված են մի քանի ժամ սպասել: Ճանապարհային ոստիկանությունը բողոքելու պատճառ չունի, դա իր գործն է: Սա գալիս է նաև մարդատար ավտոմեքենաների վարորդների անճոռնիությունից, ոչ ոք չի ուզում զիջել:

Մենք շեղել ենք բոլոր երթուղիները, արդյունքում տուժում են բոլորը, հասարակությունը, գծատերը, վարորդը պետք է կատարի 7-8 ռես, կարողանում է կատարել միայն 4-5 ռես: Ճանապարհային ոստիկանությունն էլ պետք է բարի լինի ու խցանումների ժամանակ տեղում լինի:

Տեքստում սխալ կամ վրիպակ նկատելու դեպքում, ուղարկեք խմբագրին հաղորդագրություն` նշելով տվյալ սխալը, այնուհետև սեղմելով Ctrl-Enter: