Ձեր վստահելի աղբյուրը

«Քաղաքական ռադիկալ և արմատական ուժերը կարծում են, որ հանձնաժողովների, հանրային խորհրդի ստեղծումը ներկա «կրակը մարելու կամ ծուխը կտրելու միջոց են: Իսկ հասարակությունը միշտ պետք է ընդգրկված լինի պետական հանձնաժողովների մեջ և փորձի իր ներկայությամբ, իր որակով փոխել իրավիճակը»,- ասուլիսում ասաց «Ժառանգություն» խմբակցության անդամ Լարիսա Ալավերդյանը: 

Ըստ ԱԺ պատգամավորի, արմատական ընդդիմությունը չի ցանկանում ընդգրկվել խորհրդի մեջ, որովհետև չի հավատում նրանց: «Մեր խնդիրը հավատ ներշնչող մարմին, միջավայր ստեղծելն է»,-ընդգծեց Լ. Ալավերդյանը: Նրա խոսքով, հանրային խորհուրդն այնքանով կլուծի խնդիրներ, ինչքանով հասարակությունն ընդգրկված լինի դրա մեջ: «Հասարակությունը պետք է ջանքեր գործադրի, որ հասնի փոփոխության»,-ասաց Լ. Ալավերդյանը:

Ալավերդյանի կարծիքով, խորհրդի գործերին կարող է մասնակից լինել Պերճ Զեյթունցյանը, ով «քաղաքացիության արիությունը կրող անձնավորություն է»:

Անդրադառնալով խորհրդարանում նոր երեք հանձանժողովների ստեղծմանը` նա նշեց, որ իրենք դեմ են հանդես եկել, քանի որ դեմ են ձևին, պահին, ոչ թե` միջոցին: «Ամեն մի խորքային պրոբլեմի լուծման համար չպետք է ստեղծվի հանձնաժողով: Հայաստանում անհրաժեշտ է ստեղծել երեխաների և կանանց իրավունքների հանձնաժողով»,-նշեց Լ. Ալավերդյանը:

Նրա խոսքով, հանձնաժողովներ ստեղծվում են առաջին նստաշրջանի ժամանակ: «Նոր գումարման ազգային ժողովը պետք է ստեղծի իր կառուցվածքը և հադես գա իր աշխատանքային ժամանակահատվածում, ոչ թե կեսից փոխոխություններ կատարի, ավելացնի, կրճատի: Կառուցվածքը պետք է լինի հստակ, կուռ և համապատասխանի այն հինգ տարվա ծրագրին, գերակայություներին, որոնք դրվել են կառավարության ծրագրում»,-ասաց ԱԺ պատգամավորը: