Ձեր վստահելի աղբյուրը

Երկրում ընթացող դատավարությունների մակարդակը չի բավարարում ԱԺ պետաիրավական հարցերի մշտական հանձնաժողովի նախագահ, ԵԽԽՎ հայաստանյան պատվիրակության ղեկավար, արդարադատության նախկին նախարար Դավիթ Հարությունյանին, և դա, ըստ նրա, անթույլատրելի է: «Եթե դատավորը դատավարության ժամանակ ննջում է, ապա դա կարգապահական տույժի հիմք է»,-ասաց նա:

Հարցին, արադարադատության նախարար լինելու օրոք ինքը կմիջամտեր նման դեպքերին, Հարությունյանը պատասխանեց, որ չէր միջամտի, քանի որ համարում է, որ գործադիրը պետք է նվազագույնը միջամտի դատական համակարգին, դրա փոխարեն կկատարեի օրենսդրական փոփոխություններ, «ինչն ի դեպ արել եմ»: Նրա կարծիքով, օրենսդրական հիմքը ստեղծված է, սակայն դրանք առայժմ արդյունավետորեն չեն իրականացվում: Իսկ արադարադատության նախարարը պետք է կարգապահական վարույթ հարուցի այն ժամանակ, երբ համոզվի, որ սպառված են բոլոր մյուս հնարավորությունները: «Դա է իրականում միակ ճանապարհը ուժեղ, պատասխանատու դատական իշխանության կայացման համար»,-կարծիք հայտնեց նա:

Բանախոսի համոզմամբ, քրեական դատավարությունը մեր երկրում շատ կաղում է, և դա բնորոշ է հետխորհրդային երկրներին, «քանի որ մեր քրեական դատավարության հիմքում դեռևս ընկած է հին ռուսական դպրոցի քրեական դատավարությունը»: Այս առումով ևս նա հիմնային լուծման կողմնակից է: «Առաջին կարևորագույն խնդիրն այն է, որ քրեական դատավարությունը պետք է փոխվի»,-ասաց նա, ավելացնելով, որ գործող օրենքի պարագայում մենք երբևէ լուրջ հաջողությունների չենք հասնի: Նրա համոզմամբ, պետք է քրեական դատավարության նոր օրենք, որը կհամապատասխանի ժողովրդավարական բոլոր չափանիշներին: «Եթե դա հաջողվեց, ապա ես կհամարեմ, որ ես և արդարադատության նախարարը պատմական առաքելություն իրականացրեցինք»,-նշեց նա:

Ի դեպ, լրագրողներից մեկի հարցին ի պատասխան արդարադատության նախկին նախարարը նշեց, որ ոչ մի խանդի զգացողություն չունի հանրապետության գլխավոր դատախազի ու արդարադատության նախարարի նկատմամբ, ինչի վերաբերյալ թյուր կարծիք ձևավորվել է ՄԻՊ արտահերթ զեկույցի վերաբերյալ խորհրդարանական լսումներից հետո, երբ ինքը բավականին սուր հարցադրումներ էր ներկայացնում: Դ. Հարությունյանը նման հարցադրւոմները բնական է համարում: