Ձեր վստահելի աղբյուրը

«Մարդու իրավունքների Եվրոպական դատարանի վճիռներին չի կարելի նայել հաղթանակի կամ պարտության տեսանկյունից, քանի որ ցանկացած վճիռ, որոշում նպատակ ունի ուղղորդել Հանրապետությանը, պաշտոնական անձանց ու պետական մարմիններին»,-այսօր լրագրողների հետ հանդիպման ժամանակ ասաց ՀՀ արդարադատության փոխնախարար, Մարդու իրավունքների եվրոպական դատարանում ՀՀ կառավարության ներկայացուցիչ Գևորգ Կոստանյանը:

Մասնավորապես, արդարադատության փոխնախարարն անընդունելի է համարում երեկվանից «Մելտեքս» ընկերության տարած հաղթանակի մասին լուրերը: Հիշեցնենք, որ Եվրոպական դատարանը երեկ` հունիսի 17-ին վճիռ է կայացրել «Մելտեքս» ընկերությունն ընդդեմ Հայաստանի Հանրապետության գործով:

Գևորգ Կոստանյանի կարծիքով, հաղթանակի մասին խոսակցությունները հակասում են ոչ միայն Եվրոպական դատարանի վճիռներին ու տրամաբանությունը, այլ նաև նրանց նպատակին: «Բազմիցս խոսել եմ, դրանց կարևորության, իմաստի և նպատակի մասին, որոնք անհրաժեշտ են ՀՀ-ին` ամբողջությամբ վերցված, երբեք որևէ առիթով Եվրոպական դատարանի վճիռներին չի կարելի վերաբերել հաղթանակի կամ պարտության տեսանկյունից: Ցանկացած վճիռ ու որոշում ուղղորդում է ՀՀ պաշտոնական անձանց ու պետական մարմիններին որպեսզի ոչ միայն օրենսդրությունը կազմակերպեն այնպես, որ դրանք համահունչ լինեն եվրոպական չափանիշներին, այլ նաև, որ օրենսդրության կիրառման արդյունքում իրավակիրառ պրակտիկան ևս համահունչ լինի դրան:

Բացի այն, որ Մարդու իրավունքների եվրոպական դատարանում ՀՀ կառավարության ներկայացուցիչն անընդունելի է համարում հաղթանակի կամ պարտության մասին խոսելը, նաև նշում է, որ զուտ ֆորմալ առումով նայելով այս հարցին պաշտոնապես կարող է հայտարարել, որ ՀՀ-ն այս վճիռներով ավելի շատ հաղթել է, քան պարտվել: «Ես կարող եմ փաստել, որ 5/6-րդ մասով Հայաստանի Հանրապետությունը հաղթել է և միայն 1/6- ով է հաղթել «Մելտեքս»-ը: Ես փորձում եմ խոսել մեր հարգարժան փաստաբանների ոճով»,-ասաց Գ. Կոստանյանը ևս մեկ անգամ նշելով, որ եվրոպական դատարանի վճիռների մասին այդպես չեն խոսում:

3 ՊԱՀԱՆՋԻՑ 2-Ը ՄԵՐԺՎԵԼ Է

Բոլորովին չհմաձայնվելով Հայաստանի պարտվելու ձևակերպման հետ Գ. Կոստանյանն ասաց, որ այս դեպքում ևս չենք կարող ասել, որ պարտվել ենք, ավելին` «նրանք ներկայացրել էին 3 պահանջ, որոնցից 2-ը մերժվել է և միայն մեկի վերաբերյալ է կայացրել վճիռ ու արձանագրվել խախտման փաստ»: Համաձայն հայցադիմումի, ընկերությունը համարում էր, որ խախտվել է իր` խոսքի և ազատության, արդար դատաքննության և որ այդ իրավունքների խախտումներն իրականացվել են խտրականության արդյունքում:

Եվրոպական դատարանը համարել է, որ ներպետական ատյաններում «Մելտեքս»-ի արդար դատաքննության իրավունքը չի ոտնահարվել և խտրականության չի դրսևորվել: Մարդու իրավունքների եվրոպական դատարանի վճիռը փաստում է, որ խախտվել է միայն ընկերության խոսքի ազատության իրավունքը, այն առումով, որ Հեռուստատեսության և ռադիոյի ազգային հանձնաժողովը մերժելիս հստակ չի նշել մերժման պատճառները:

Այս առումով, արդարադատության փոխնախարարը փաստեց, որ այս վճիռը կօգնի, որ այսուհետ Հանձնաժողովը ոչ միայն հաղթելու, այլ նաև մերժելու պատճառներն ու հիմնավորումները հստակ ներկայացնի:

ԱԿՆԿԱԼՎԱԾԻ ՄԻ ՄԱՍԸ ԿԳՆԱ ԼՈՆԴՈՆ

Մեսրոպ Մովսիսյանն, ով այս գործով այդպես էլ Եվրոպական դատարանի կողմից տուժող չճանաչվեց ու «Մելտեքս» ՍՊԸ ակնկալում էին Հայաստանի կառավարությունից որպես փոխհատուցում ստանալ 1մլն 500 հզ դոլար, սակայն կառավարության բանակցությունների արդյունքում Եվրոպական դատարանը որոշեց որպես փոխհատուցում սահմանել 30 հզ եվրո:

«Մելտեքս» ընկերությունը Մարդու իրավունքների Եվրոպական դատարան էր դիմել նյութական, ոչ նյութական և փաստաբանական ծախսերի փոխհատուցման պահանջով, ընդորում փաստաբանական ծախսերն էլ բաժանված էին երկու մասի` ներպետական և միջազգային:

Եվրոպական դատարանը ներպետական փաստաբանական ծախսերի մասով մերժել է ընկերության պահանջը և միայն 10հզ եվրո սահմանել միջազգային փաստաբանական ծախսերի համար: Ի դեպ, Մարդու իրավունքների եվրոպական դատարանում ՀՀ կառավարության ներկայացուցիչ Գևորգ Կոստանյանը նշեց, որ միջազգային փաստաբանական ծառայություններ «Մելտեքս» ընկերությանը տրամադրել է «ՔԵՅ ՋԵՅ ԱՐ ՓԻ» լոնդոնյան փաստաբանական ընկերությունը, որը Մարդու իրավունքների Եվրոպական դատարանում ներկայացնում է հիմնականում Ադրբեջանի քաղաքացիների շահերը: Նշված ընկերությանը գումարը կուղարկվի անմիջապես բանկային հաշվի վրա:

Իսկ ինչ վերաբերում է վճռից բխող հետևանքներին, ապա Գևորգ Կոստանյանն ասում է, որ «Մելտեքս» ընկերությունը, անկախ այս վճռի առկայությունից միշտ էլ իրավունք ունեցել է դիմել և մասնակցել հաճախականության համար հայտարարած ցանկացած մրցույթի:

Պաշտոնատար անձի պատասխանատվության ենթարկելու մասին հարցին էլ, Գ. Կոստանյանը պատասխանեց, որ դա հնարավոր կլինի միայն քննություն անցկացնելուց ու հանգամանքները հստակ պարզելուց հետո: