Ձեր վստահելի աղբյուրը

Կրթության և գիտության նախարար Սպարտակ Սեյրանյանը հունիսի 21-ից 24-ը պաշտոնական այցով գտնվում էր Սիրիայի Արաբական Հանրապետությունում։ Ինչպես տեղեկացանք ԿԳՆ հասարակայնության հետ կապերի և տեղեկատվության վարչությունից, այցի ընթացքում ԿԳ նախարարը հանդիպումներ է ունեցել ՍԱՀ վարչապետ Նաջի Օտրիի, բարձրագույն կրթության և գիտության նախարար Ղիաս Բարաքաթի, կրթության նախարար Ալի Սաադի, հայ-սիրիական միջկառավարական հանձնաժողովի սիրիական կողմի համանախագահ, տնտեսության նախարար Ամեր Հոսնի Լուտֆիի հետ, Հալեպի նահանգապետ Թամեր ալ-Հիջիի հետ, ինչպես նաև այցելել է Դամասկոսի, Հոմսի և Հալեպի համալսարաններ։ ՍԱՀ վարչապետի հետ հանդիպման ընթացքում ևս մեկ անգամ ընդգծվել է բազմաբնույթ հարաբերությունները խորացնելու երկու երկրների պատրաստակամությունը։
ՍԱՀ կրթության և գիտության նախարար Ղիաս Բարաքաթի հետ տեղի են ունեցել խորքային քննարկումներ՝ ոլորտում առկա խնդիրների լուծման ուղղությամբ։ Քննարկվել են երկու երկրների ԲՈւՀ-երի կողմից տրվող կրթական վկայականների հավասարազորացման խնդիրները, ինչպես նաև հարցի կարգավորման վերաբերյալ պայմանագրի հայկական նախագծի նկատմամբ սիրական կողմի նկատառումները։ Բարձրագույն կրթության նախարարությունում կայացած հանդիպման ընթացքում ընդգծվել է, որ սիրիական կողմը որևէ վերապահում չունի հայկական պետական ԲՈւՀ-երի նկատմամբ, և նշվել է, որ ԵՊՀ շրջանավարտ Սիրիայի քաղաքացիները համարվում են լավագույն մասնագետները և աչքի են ընկնում ստացված կրթության որակով։

ՀՀ կրթության և գիտության և ՍԱՀ կրթության նախարարները հունիսի 22-ին ստորագրել են կրթության և գիտության ոլորտում 2008-11թթ. համար համագործակցության գործնական ծրագիրը։ Նախկին ծրագրի գործունեության ժամկետն ավարտվել էր 2006 թվականին։ Ներկա գործնական ծրագիրը շահեկանորեն տարբերվում է նախկին տարիներին կնքվածներից և համագործակցության նոր և լայն դաշտ է ապահովում կողմերի համար։ Գործնական ծրագրով հայկական կողմը ուսանողների փոխանակման առումով գրեթե կրկնակի հնարավորություններ ունի սիրիական կողմի համեմատությամբ։ Փաստաթղթում ամրագրված են նոր ասպարեզներ, մասնավորապես երաժշտական ուսուցման բնագավառում դասախոսների փոխանակման, գիտական հաստատությունների միջև համագործակցության, ինչպես նաև առանձին հոդվածով նշվել է կողմերի հանձնառությունը՝ ավարտական վկայականների հավասարազորացման պայմանագիրը ստորագրելու մասին։
Կրթության և գիտության նախարարը հունիսի 24-ին կատարել է Հալեպի համալսարանում հայկական ուսումնասիրությունների կենտրոնի պաշտոնական բացումը, որը լուրջ իրադարձություն է հայ-սիրիական հարաբերություններում։
Այցի ընթացքում Հայաստանի նախարարը հանդիպում է ունեցել նաև Դամասկոսի և Հոմսի համալսարանների ռեկտորների հետ։ Դամասկոսի համալսարանում հանդիպման ընթացքում առարկայական քննարկումներ են կայացել հայագիտական ամբոնի բացման ուղղությամբ, որի հիմնադրման գաղափարը ռեկտորը ողջունել է։ Նա առաջարկել է այս ուղղությամբ առանձին փաստաթուղթ ստորագրել իր հայ գործընկերոջ հետ, ում այցելությունը Սիրիա նախատեսվում է այս տարի հոկտեմբերին։ Հայաստանի կրթության և գիտության նախարարը շեշտել է, որ կրթական համագործակցությունից զատ անհրաժեշտ է օգտագործել նաև միմյանց գիտահետազոտական հնարավորությունները, մշակել համատեղ գիտական ծրագրեր։ Նշվել է, որ Հայաստանում գոյություն ունի արևելագիտության և մասնավորապես արաբագիտության հարուստ ավանդույթ և բարձր հեղինակության վայելող դպրոց, իսկ Մատենադարանում պահվող արաբալեզու բազում ձեռագրերից ոչ բոլորն են արժանացել հանգամանալի ուսումնասիրության, և այս հնարավորություններից կարող է օգտվել թե՜ Սիրիան, և թե՜ ողջ արաբական աշխարհը։ Քննարկվել է երկու երկրների մայր ԲՈւՀ-երի միջև համագործակցության զարգացման և խորացման հնարավորությունը։ Դամասկոսի, այնուհետև նաև Հոմսի և Հալեպի համալսարաններում կայացած հանդիպումների ժամանակ, որպես գիտահետազոտական ուսումնասիրությունների առավել նախընտրելի ուղղություններ, նախանշվել են վերականգնվող էներգիայի, ճարտարապետության, սեյսմիկ պաշտպանության, հումանիտար գիտությունների, ձեռագրերի ուսումնասիրության, ծրագրավորման, դեղագործության, տեղեկատվական տեխնոլոգիաների, գեղարվեստի և այլ բնագավառներ։
Բոլոր հանդիպումների ընթացքում մշտապես ընդգծվել է հայ-սիրիական և հայ-արաբական ջերմ պատմական բարեկամությունը, դարերով կուտակված ավանդույթներն ամրապնդելու անհրաժեշտությունը և հայ համայնքի օրինակելի դերը սիրիական հասարակության շրջանում։
Նախարարը և նրան ուղեկցող պատվիրակությունը հանդիպել են Դամասկոսի և Հալեպի հայկական կրթական հաստատությունների ղեկավարների, ուսուցիչների և աշակերտների հետ և քննարկել կրթօջախների առաջ ծառացած խնդիրները: Հանդիպումների ընթացքում կարևորվել է ՀՀ ԿԳՆ-ի կողմից Սփյուռքի դպրոցներին աջակցելու անհրաժեշտությունը:
ՀՀ կրթության և գիտության նախարարի և նրան ուղեկցող պատվիրակության այցը լայն արձագանք է գտել սիրիական մամուլում։