Ձեր վստահելի աղբյուրը

Օրերս Panorama.am-ի խմբագրությունը նամակ էր ստացել լսողական խանգարումներ ունեցողների դպրոցի խնդիրների հետ կապված: Նամակի հեղինակը նշել էր, թե այս տարի կրթության և գիտության նախարարությունը որոշել է, որ լսողության խանգարումներ ունեցող թիվ 9 դպրոցի աշակերտները պետք է տեղափոխվեն Հին Նորքում գտնվող նույն անվանումով թիվ 15 դպրոցը: Ծնողները կտրականապես դեմ են իրենց երեխաներին այլ դպրոց ուղարկելուն, քանի որ «թիվ 15 դպրոցում սովորում են բացարձակապես չլսող երեխաներ»: Ծնողների և ուսուցիչների հավաստմամբ` լսողական խանգարումներ ունեցող երեխաները դեռ առաջին դասարանից սովորում են հնչյուններ արտաբերել, բարձրաձայն կարդալ: Նրանց հիմնական հաղորդակցման միջոցին` ժեստերի լեզվին զուգահեռ ուսուցիչների ջանքերով նրանք տիրապետում են բանավոր խոսքին: Մտահոգությունը մեծ էր, որ բացարձակ չլսող երեխաների կողքին իրենց երեխաները ամբողջովին կդադարեն խոսել:
Այս հարցը պարզաբանելու համար դիմեցինք, կրթության և գիտության նախարարության հատուկ կրթության բաժնի պետ Նուրիջան Մանուկյանին:

Նա նշեց, որ նախարարությունը առաջարկություն է արել կառավարությանը, որ լսողության խանգարումներ ունեցող թիվ 9 դպրոցի այն աշակերտները, ովքեր լսողության հետ խանգարումներ ունեն, տեղափոխվեն հանրակրթական այն դպրոցները, որոնք իրականացանում են ներառական կրթություն, իսկ այն երեխաները, ովքեր ընդհանրապես չեն լսում, պետք է տեղափոխվեն Հին Նորքի թիվ 15 դպրոց:

Այսօր հանրապետությունում գործում է ներառական կրթություն իրականացնող 14 դպրոց, իսկ սեպտեմբերին այդ թվին կավելան ևս 17-ը: Նախատեսվում է, որ մինչև 2015 թիվը հանրապետությունում գործի 150 դպրոց:
Նուրիջան Մանուկյանի խոսքով, աշակերտների ընտրությունը կիրականացնի նախարարության ներքո գործող կրթական կարիքի գնահատման բժշակահոգեբանամանկավարժական կենտրոնը: Նա հայտնեց, որ թիվ 15 դպրոցում սովորում են ընդհանրապես չլսող երեխաները, իսկ թիվ 9 դպրոցում սովորում են և լսողության հետ խանգարումներ ունեցող և ընդհանրապես չլսող երեխաները:

Իսկ թիվ 9 դպրոց ինչու՞ են ընդունել բացարձակապես չլսող երեխաներին, այն դեպքում երբ գործում էր թիվ 15 դպրոցը: Ն. Մանուկյանը նշեց, որ դեռևս խորհրդային միության տարիներին հասարակական հիմունքներով գործել են բժշկահոգեբանամանկավարժական հանձնաժողովներ, որտեղի բժիշկները տվել են եզրակացություն, որոնց հիման վրա էլ ընդունել են այդ դպրոց:
«Այս քայլը հատուկ կրթության համակարգի բարեփոխման գործընթացք է: Նման քայլով լսողութայն խանգարումներ ունեցող երեխաները ինտեգրվում են հասարակություն »,- բացատրեց նա:

Վարչության պետի տեղեկացմամբ, թիվ 9 դպրոցի երեխաների տեղափոխությունը թիվ 15 դպրոց` նպատակահարմար է, քանի որ այն շատ հարմարավետ է. ունի ննջարանային մասնաշենք` կահավորված գույքով, իսկ առաջիկայում նախատեսվում է դպրոցը վերանորոգել: Նա նշեց, որ թիվ 9 դպրոցի պայմանները վատն են, շենքը հին է և կիսաքանդ:

Ինչ վերաբերում է թիվ 9 դպրոցի ուսուցչական կազմին ճակատագրին, Ն. Մանուկյանը տեղեկացրեց, որ դպրոցի լավագույն ուսուցիչները կտեղափոխվեն թիվ 15 դպրոց: Հետագայում նախատեսվում է, որ թիվ 15 դպրոցը դառնա լսողության խանգարումներ ունեցող երեխաների կրթության կազմակերպման բազային կենտրոն: «Այդ ժամանակ արդեն մնացած ուսուցիչներն էլ կվերապատրաստվեն և կաշխատեն այդ կենտրոնում»,- ասաց նա:

Հարցին, թե ինչպես է որոշվելու թիվ 9 դպրոցի մասնաշենքի ճակատագիրը, բաժնի պետը պատասխանեց, որ նախատեսվում է դպրոցը միացնել հարևանությամբ գործող խոսքի խանգարում ունեցող երեխանների դպրոցին: