Ձեր վստահելի աղբյուրը

Հայաստանի հարկային պետական ծառայությունը ձեռնամուխ է եղել բիզնեսի փաստաթղթաշրջանառության նկատմամբ վերահսկողության ուժեղացմանը: Այս մասին այսօր Մամուլի ազգային ակումբում հայտնեց ծառայության պետի տեղակալ Արմեն Ալավերդյանը: Նա հավելեց նաև, որ դա արվում է վարչարարության արդյունավետությունը բարձրացնելու նպատակով:

Ա. Ալավերդյանի խոսքով, մեր հայրենի ձեռնարկատերերը երկար տարիների ընթացքում սովորել են իրենց բիզնեսը վարել` առանց փաստաթղթեր ձևակերպելու կամ դրանց իրական ծավալները ցույց տալու: «Գործարքները համատարած ձևակերպվում են ոչ պատշաճ, և հասկանալի չէ, թե ով պետք է եկամտահարկ վճարի»,- ասաց ՀՊԾ պետ տեղակալը:

Այս տարվա հունիսից այս ուղղությամբ լուրջ աշխատանք է տարվում: Նախագահն ու վարչապետը հանդիպումներ են ունեցել խոշոր բիզնեսի ներկայացուցիչների հետ, քանի որ հենց նրանց հետ են հիմնականում նման խնդիրներ ծագում: Հանդիպմանը հրավիրվել են մասնակցելու խոշոր գործարարներ այնպիսի ոլորտներից, ինչպիսիք են հացամթերքների, կաթի, ալկոհոլային խմիչքների և շինարարական նյութերի արտադրությունը:

Ա. Ալավերդյանի տեղեկացմամբ, սովորական հարկային ստուգումները կրճատվելու են, իսկ լուրջ մասնագիտական ստուգումներ անցկացվելու են միայն ռիսկային ոլորտներում աշխատող ձեռնարկություններում: Այս իմաստով, ըստ ՀՊԾ պետի, ռիսկային են շինարարական նյութերի, կենցաղային տեխնիկայի, ալկոհոլային խմիչքների և սննդամթերքի իրացման ոլորտները: «Եթե մեզ հաջողվի նրանց հետ հարկային ցուցանիշների վերաբերյալ համաձայնության գալ, լավ կլինի: Հակառակ դեպքում` կան այլ կոշտ գործիքներ, որոնք կկիրառվեն հարկեր չվճարող հարկատուների նկատմամբ` անկախ նրանց մեծությունից»,- հայտարարեց Ա. Ալավերդյանը:

Նա հավելեց, որ խոշոր ձեռնարկատերերի հետ աշխատանքն արդեն պտուղներ տալիս է, սակայն չբացառեց, որ աստիճանաբար նրանց հետ աշխատանքը կարող է և բարդանալ: «Իրենք իրենց շահերը պաշտպանելու և լոբբինգ անելու իրենց մեթոդներն ունեն, ինչը կարող է դժվարացնել մեր աշխատանքը: Սակայն մենք հենվում ենք մեր նախագահի ու կառավարության աջակցության վրա, որոնց պետք է ներկայացնենք այս հիմնախնդիրները և որոնք հայտարարել են, որ ոչ մեկի համար ոչ մի հովանավորություն չի լինելու»,- ամփոփեց Ա. Ալավերդյանը: