Ձեր վստահելի աղբյուրը

Հայաստանը պարենային մթերքների ներկրման ու արտահանման հաշվեկշռի ու պարենամթերքների առումով 3 անգամ ավելի շատ պարենամթերքներ է ներկրում, քան՝ արտահանում: Այս պատճառով էլ երկրի պարենային գյուղատնտեսությունը շատ ավելի զգայուն է միջազգային շուկայի գների փոփոխությունների նկատմամբ: Այսօրվա ասուլիսում, խոսելով աշխարհում պարենային ճգնաժամի ու Հայաստանի վրա դրա ազդեցության մասին, ասաց գյուղատնտեսության առաջին փոխնախարար Սամվել Ավետիսյանը:

Բացի միջազգային շուկայի գների տատանումներից, նրա հավաստմամբ, գյուղատնտեսության ոլորտը զգայուն է նաև բնակչության` պարենամթերքի տնտեսական ու ֆիզիկական հասանելիության ապահովման առումով:

Այս բացասական ազդեցությունը, Ս. Ավետիսյանի խոսքով, անհանգստացնում է ոչ միայն ներկրող երկրներին, այլև այն խոշոր երկրներին, որոնք արտահանում են. «Աշխարհի շատ լիբերալ հայացքների տեր տնտեսագետները համաձայն չեն, թե աշխարհում պարենային ճգնաժամ կա: Ըստ նրանց, եթե կա առաջարկ և երկիրը գումար ունի, ապա նա կարող է միշտ էլ գնումներ կատարել»:

Փոխնախարարի ներկայացմամբ, քանի որ այսօրվա իրականության մեջ պարենի առաջարկը պայմանավորված է մի շարք բնական գործոններով, ապա լինում են իրավիճակներ, երբ պարենի անբավարարության դեպքում պարեն առաջարկող երկրները բարձրացնում են գներն ու մատակարարում են այն ավելի վճարունակ երկրների:

Ըստ նրա, ՄԱԿ-ի պարենի և գյուղատնտեսության միջազգային կազմակերպության տվյալների համաձայն, 1945-1995 թվականը պարենային մթերքների աճը աշխարհում տարեկան կազմել է 30 մլն տոննա, 1995-2005 թվականն ընկած ժամանակահատվածում՝ 12 մլն տոննա: Կանխատեսումները ցույց են տալիս, որ 2005-2025 թվականներին այդ ցուցանիշը կարող է չգերազանցել 9 մլն տոննան և դա այն պարագայում, երբ մոլորակի բնակչության թիվն ինտենսիվ կերպով աճում է:

Նշենք, որ գյուղատնտեսության փոխնախարարի խոսքով, խնդրի լուծումը պետք է լինի երկրում պարենի սեփական արտադրության ավելացումը: Այժմ Հայաստանում պարենային մթերքների` ցորենի, շաքարի, բուսական յուղի, մսի, շատ ցածր ինքնաբավության մակարդակ է գրանցվում: Միջինում պարենային ցորենի ինքնաբավությունը 35-40 % է կազմում, բուսական յուղինը չի գերազանցում 5-6%-ը, իսկ շաքարի 100%-անոց ցուցանիշն ապահովվում է ներկրման միջոցով: