Ձեր վստահելի աղբյուրը

Բջջային կապի օպերատոր «Ղ-Տելեկոմ» ընկերությունը (VivaCell ապրանքանիշ), Հայաստանի կառավարությանն առընթեր հարկային պետական ծառայության կողմից հրապարակված 2008թ. առաջին կիսամյակի տվյալներով, գլխավորել է Հայաստանի խոշոր հարկատուների ցուցակը: Նախորդ տարվա նույն ժամանակահտվածում ընկերությունը 4-րդն էր:

ՀՊԾ տվյալներով, հաշվետու ժամանակահատվածում ընկերությունը պետբյուջե է վճարել 15 մլրդ. դրամ` նախորդ տարվա հունվար-հունիս ժամանակահատվածի 7.4 մլրդ. դրամի փոխարեն: Ընդ որում 12.1 մլրդ. դրամը կազմել են հարկային մարմինների կողմից հավաքագրված գումարները, իսկ 2.9 մլրդ. դրամը` մաքսային մարմինների: Միևնույն ժամանակ հարկային վճարումներից 5.8 մլրդ. դրամը կազմել են ուղղակի հարկերը (եկամտահարկ, շահութահարկ), իսկ 8.3 մլրդ. դրամը` անուղղակի հարկերը (ԱԱՀ, ակցիզային հարկ): Եվս 973.7 մլն. դրամ ընկերությունը վճարել է այլ հարկատեսակների, պետտուրքերի ու պարտադիր վճարների ձևով:
ԽՈշոր հարկատուների ցուցակում երկրորդը «Հայռուսգազարդն» է, որը պետբյուջե է վճարել 9.4 մլրդ. դրամ: Դրանից 8.7 մլրդ. դրամը հավաքվել է հարկային մարմինների կողմից, 672.4 մլն. դրամը` մաքսային մարմինների: Նկատենք, որ նախորդ տարվա նույն ժամանակահատվածում «Հայռուսգազարդի» պետբյուջե կատարած վճարումները կազմել էր մոտ 12 մլրդ դրամ:

Ցուցակում հաջորդը «ԱրմենՏել» ընկերությունն է, որը պետբյուջե է վճարել 8.2 մլրդ. դրամ: Զանգեզուրի պղնձամոլիբդենային կոմբինատը 8 մլրդ. վճարումներով 4-րդն է: Նրան հետևում են նավթ ներմուծող «ՔաղՊետրոլՍերվիս» և «Ֆլեշ» ընկերությունները, համապատասխանաբար 4.9 մլրդ. դրամ և 4.8 մլրդ. դրամ ցուցանիշով: