Ձեր վստահելի աղբյուրը

Հայաստանում բջջային կապի երրորդ օպերատորի գործունեության լիցենզիա և ռադիոհաճախականությունների օգտագործման թույլտվություն ստանալու համար հայտարարված մրցույթը կավարտվի այս տարվա դեկտեմբերին, լրագրողներին այսօր կրկին հիշեցրեց տրանսպորտի և կապի նախարար Գուրգեն Սարգսյանը: Նրա խոսքով, այդ ընթացքում կորոշվի մրցույթի հաղթողը, որը կսկսի գործել հայաստանյան բջջային շուկայում որպես երրորդ օպերատոր:

Նախարարը հիշեցրեց, որ մրցույթին մասնակցելու ցանկություն են հայտնել 17 ընկերություններ 12 երկրից, որոնք առաջիկայում կանցնեն նախաորակավորման փուլ և կստանան մրցութային փաթեթները:
Նշենք, որ մասնակցելու հայտ են ներկայացրել Erance Telecom (Ֆրանսիա), CEO Blackrock Communications (Իռլանդիա), V-Tel (Հորդանան), GEO (Անգլիա), M$A Tele2 AB (Շվեդիա), Knightsbridge International Telecommunications Holding (Ավստրիա), Aetos Consulting Limited (Անգլիա), Kalba International (Եգիպտոս), AAA Capital GmbH (Գերմանիա),Auroratel (Ռուսաստանի Դաշնություն), PJ Engineering (Ֆինլանդիա), Eventis Telecom (Ռուսաստանի Դաշնություն), EEC group (Եգիպտոս), mmC Group (Իսպանիա), Samsson group (Գերմանիա): Ի դեպ, SALEM AGENCIES AND SERVICES CO. (SAS) և JGAG ընկերությունները նույնպես ցանկություն են հայտնել մասնակցել մրցույթին, սակայն չեն նշել, թե որ երկիրն են ներկայացնում:

Մրցութային հանձնաժողովը 40 օրվա ընթացքում կհրապարակի նախաորակավորման փուլ անցած ընկերությունների անունները: Դրանից հետո ևս 40 օրացուցային օրվա ընթացքում նախաորակավորում անցած ընկերությունները պետք է հանձնաժողովին ներկայացնեն հայտ-առաջարկներ:
Հուլիսի 17-ին և 18-ին «Financial Times»-ում հրապարակվել է մրցույթի մասին հայտարարություն: Մրցութային փաստաթղթերի ձևակերպումը կարժենա 10 հազար եվրո, իսկ առաջարկվող նվազագույն գումարը պետք է լինի 10 մլն եվրո:
Ներկայում Հայաստանում գործում է բջջային կապի երկու օպերատոր` «ԱրմենՏել»-ը, որի բաժնետոմսերն ամբողջությամբ պատկանում են ռուսական «ՎիմպելԿոմ» -ն, և ՎիավաՍելլ-ը, որի հսկիչ փաթեթը տնօրինում է ռուսական ՄՏՍ ընկերությունը: