Ձեր վստահելի աղբյուրը

Հայաստանում արդեն տարածված չէ ցայտաղբյուրներ կառուցելն ու քաղաքացիներին բնական ջուր «մատուցելը». ամռան տապը մի փոքր ու արագ «հանգցնելու» համար գնում ենք վերջերս մեծ տարածում գտած սառը թեյեր կամ սուրճեր:

Պարզ է` շոգած ու ծարավ մարդու ձեռքը եթե ինչ-որ սառը բան ընկավ` անմիջապես կխմի, չնայելով, թե երբ է արտադրվել, պիտանի է, պիտանի չէ: Խմելուց հետո, երբ «աչքերդ բացվում են», նոր միայն նայում ես ու տեսնում, որ ասենք ժամկետանց է կամ էլ` ընդհանրապես մակնշում չունի:

Քաղաքացին «Prestige» ընկերությանը պատկանող «Գնահատիր իսկականը» վրան գրված 100 գրամանոց սառը թեյի տարան ձեռքին մտավ Panorama.am-ի խմբագրություն: «Առել եմ, խմել ու հանկարծ տեսել, որ վրան գրված է` ժամկետը 20 օր, բայց չկա գրված` երբվանից»: Թունավորվելը` չէր թունավորվել, բայց անհանգստացել էր մյուսների համար. «Ամառ, շոգ` թունավորում, հազար բան»: Եթե քաղաքացին այդքան սրտացավ է, ապա իհարկե Panorama.am-ին չէր սազի անտարբեր լինել:

Փորձեցինք այդ փաստը պարզել հենց «Prestige» ընկերությունից: «Այդպիսի բան հնարավոր չէ: Մենք «կլեուշիով» ենք վրան կպցնում արտադրման ժամկետը, որը երևի պոկվել է»,-կարճ կապեց ընկերության աշխատողը, որ չցանկացած էլ ներկայանալ: Հետո, այնուամենայնիվ, ավելացրեց. «Եթե ուռած չէ, ուրեմն նորմալ է»:

Երևի վստահ կամ պատրաստ չէր հարցերին պատասխանել: Իզուր. «Սպառողների իրավունքների պաշտպանություն» ՀԿ-ի նախագահ Աբգար Եղոյանը նշեց, որ արտադրողն իրավունք ունի կամ տպագիր կամ «կլեուշիով» արտադրանքի վրա կպցնել արտադրման ժամկետը:

«Եթե գնել ես ու վրան չկա մակնշում, ապա դա վաճառողի մեղքն է, քանի որ այդ դեպքում ամբողջ պատասխանատվությունը ընկնում է հենց նրա վրա: Նա իրավունք չունի վաճառել, եթե վրան մակնիշ չկա կամ ժամկետանց է»,-բացատրեց Ա. Եղոյանը: Ըստ նրա` իրենք իրավունք չունեն չհավատալու արտադրողին:

Նշենք, որ մակնշումն անպայման պետք է լինի հենց փաթեթավորման վրա: Եթե չկա, մնում է վարվել այնպես, ինչպես գրված է. «Պահել մութ ու զով տեղում». Մարդիկ գրել են` գնահատիր, չեն գրել` խմիր: