Ձեր վստահելի աղբյուրը

Վրաստան-Հայաստան երկաթուղով բեռնափոխադրումներն իրականցվում են կանոնավոր կերպով: «Այս գիշեր, ժամը 2:00-ին 60 վագոն տարբեր տեսակի ապրանքներ ենք ներմուծվել Հայաստան»,-ճեպազրույցում հայտնեց տրանսպորտի և կապի նախարար Գուրգեն Սարգսյանը: Այսինքն, գիշերվա ընթացքում բնականոն ճանապարհով Հայաստան է ներմուծվել 10 վագոն բենզին, 12 վագոն ավիավառելիք, 11 վագոն դիզելային վառելիք, 4 վագոն ցորեն, 23-24 վագոն տարբեր տեսակի խառը ապրանք:

Նախարարը նշեց, որ Վրաստանում ունեն 18 վագոն ցորեն, որն արդեն գտնվում է ճանապարհին: Ցորենը երկու օր առաջ բեռնաթափվել է Փոթի նավահանգստում, այնուհետև բեռնվել է երկաթուղային վագոններ, և այժմ գտնվում է Հայաստանի ճանապարհին: Փոթիում իրականացնում է ևս մեկ վագոն ցորենի բեռանաթափում: Այս պահին Փոթիում Հայաստանն ունի 6 նավ, որոնք հերթով բեռնաթափվում են: Նա վստահեցրեց, որ «երկաթուղին որևէ րոպե չի դադարեցրել իր աշխատանքները»:

Այսպիսով, ըստ նախարարի, այսօրվա ներմուծումը գերազանցում է նորմալ իրավիճակում կատարվող ներմուծման ծավալներին: Ի դեպ, Հայաստանից էլ է արտահանվում ապրանքներ:

Գ. Սարգսյանի խոսքով, կանոնավոր կերպով գործում է նաև Երևան-Թբիլիսի և Երևան-Բաթումի ուղևորափոխադրում իրականացնող երթուղին: «Այստեղից մեկնող գնացքները հիմնականում դատարկ են գնում: Օրինակ, նախօրեին գնացքով մեկնել է 11 հոգի, իսկ վերադարձող գնացքն ամբողջովին լիքն էլինում. այսօր 262 ուղևոր Բաթումիից ուղևորվում է Հայաստան»,-ասաց նախարարը` ավելացնելով, որ ճանապարհները վտանգավոր չեն, երկաթուղին ապահով է և որևէ խնդիր չկա:

Բացի երկաթուղուց, հայաստանցի հանգստացողները հնարավորություն ունեն վերադառնալ նաև ավտոբուսներով: Բաթումիի հյուպատոսի տեղեկացմամբ, այսօր 400 հոգի դուրս են գալու և ճանապարհ են ընկնելու դեպի Հայաստան, որոնցից 236-ը ավտոբուսներով են տեղափոխվելու:

«Օր-օրի վերադարձողների քանակը նվազում է և խնդիրներն էլ պակասում են»,-ընդգծեց Գ. Սարգսյանը: