Ձեր վստահելի աղբյուրը

Տարիների փորձը ցույց է տվել, որ ընդունելության քննությունների հարցաշարերում ընդգրկված են եղել նույնիսկ 4-րդ դասարանի տրամաբանական հարցեր, որոնց դիմորդները չեն կարողացել պատասխանել: Նախօրեին ասուլիսում նման հայտարարություն է արել կրթության և գիտության նախարար Սպարտակ Սեյրանյանը:

Panorama. am-ը փորձեց պարզել` ինչն է փոխվել այս տարի և ինչը պետք է խթանի դիմորդի հենց տրամաբանության զարգացմանը:

ԿԳ նախարարի մամուլի քարտուղար Լիլիթ Գալստյանը նշեց, որ արդեն նախորդ տարվանից կիրառվող թեստային նոր համակարգը ստեղծված է «հենց դրա համար»:

«Քննությանների նոր համակարգը կնպաստի դպրոցում առավել շատ գիտելիքներ ձեռք բերելուն, միաժամանակ` տրամաբանության զարգացմանը»,-ասաց նա: Այսինքն` եթե աշակերտը դպրոցում չսովորի, նա հաստատ չի կարող ընդունվել որևէ բուհ:

Ըստ պարզաբանման, նախորդ տարիներին աշակերտները 9-10-րդ դասարաններում վճարովի պարապում էին այսպես կոչված «ուժեղ մասնագետների մոտ», որի ընթացքում պարապող մասնագետը մի կողմ դնելով երեխայի տրամաբանությունը` «վարժեցնում էր նրան». սահմանափակվում էին միայն կոնկրետ հարցեր, բառեր անգիր սովորելով:

«Նոր համակարգը ստիպելու է ապագա դիմորդին ուսումնասիրել ամբողջ առարկան, իսկ դա հնարավոր է միայն դպրոցում»,-ընդգծեց Լ. Գալստյանը: Դա չի նշանակում, որ քննություններին պատրաստվելու նպատակով դպրոցներում փոխվել է ուսումնական ծրագիրը, այլ փոխվել է այն, որ երեխան «ուզի-չուզի»` պետք է սովորի:

Իսկ արդյո՞ք դպրոցներում գոյությո՞ւն ունեն պետականորեն սահմանված առարկայական և գնահատման չափորոշիչներ, որպեսզի ուսուցչի, ծնողի և աշակերտի համար պարզ դառնա, թե որ դասարանում ինչ պետք է սովորի, ինչպիսի և որքա՞ն գիտելիք պետք է ունենա, ինչպիսի… տրամաբանություն: Եվ` ինչն է գնահատվելու` գիտելի՞քը, տրամաբանությո՞ւնը, ինչպե՞ս:

Արդյո՞ք կան մշակված` տրամաբանություն գնահատելու հստակ չափորոշիչներ, ո՞ւմ են հայտնի դրանք: Դպրոցների տնօրեններից չհաջողվեց պարզել այս հարցերը` արձակուրդում լինելու պատճառով:

Panorama.am-ը այդ հարցին կանդրադառնա արձակուրդային շրջանն ավարտվելուց հետո, իսկ ըստ ՀՀ ԿԳՆ-ի` դրանք հայտնի են և կան «պետական պաշտոնական փաստաթղթերի» տեսքով:


Որպես տեղեկանք
Այս տարի Հայաստանի պետական բուհեր 13.007 դիմորդից ընդունվել է 10.001-ը: 2007 թվականի համեմատ այս տարի անկում է գրանցվել դիմորդների կողմից հավաքած առավելագույն միավորների ցուցանիշում։ Հայաստանի պետական ընդունող հանձնաժողովին կից Հաշվիչ կենտրոնի նախագահ Ռուբեն Թոփչյանն ասել է, որ դա չի նշանակում, որ դիմորդների պատրաստվածության մակարդակն է նվազել, այլ որ` թեստային առաջադրանքներն ավելի մանրամասնորեն են պատրաստված եղել:

Որն է լինելու երկրի ԿՐԹԱԿԱՆ քաղաքականությունը
Շատ ուսուցիչներ պնդում են, թե երեխաները գնալով ավելի վատ են սովորում, քանի որ ունեն ավելի հետաքրքրի զբաղմունքներ` համակարգչային խաղեր, բջջային հեռախոսներ, իսկ ընդունվող ցանկացողներից շատերն էլ հարուստ ծնողներ ունեն, ովքեր «կարող են գումարով ընդունել»: Մյուսները համոզված են, թե «սովորող ցանկացողը կսովորի` փոխվեն տեստեր, թե չփոխվեն, իսկ չցանկացողն էլ հաստատ չի սովորի»:

Կարծում ենք, որ երկու մոտեցումներն էլ ձեռնտու չեն ոչ ծնողներին, ոչ էլ, խոշոր հաշվով` երեխաներին ու երկրին: Ուստի հարց է մնում` այս քաղաքական եռուզեռի մեջ, այնուամենայնիվ, որն է լինելու կրթական... գործուն և արդյունավետ քաղաքականությունը: Ինչպե՞ս է այն գնահատվելու` ընթացքո՞վ, ադյունքո՞վ, թե՞ կրկին ու կրկին` պոտենցիալով: