Ձեր վստահելի աղբյուրը

«Հայկական Հաբիթաթ» բարեգործական հասարակական կազմակերպությունը 2000 թվականից մինչ օրս երկարաժամկետ, անտոկոս փոխառությունների միջոցով իրականացնում է բնակելի տների կառուցման և կիսակառույցներն ավարտին հասցնելու ծրագիր` այդ միջոցով, մինչ օրս կազմակերպությունը «ծառայել» է Հայաստանի ցածր եկամուտ ունեցող 403 ընտանիքների` շուրջ 80 համայնքներում 272 բնակարանների գնման և կիսակառույցների ավարտին հասցնելու գործում: Այս մասին Panorama.am-ի թղթակցի հետ զրույցում ասաց «Հայկական Հաբիթաբ», այժմ արդեն «Ֆուլեր տնաշինության կենտրոն» բարեգործական հասարակական կազմակերպության տնօրեն Աշոտ Եղիազարյանը: Նրա խոսքով, կազմակերպությունը նաև իրականացնում է տնազուրկ ընտանիքների շահերի պաշտպանության ակցիաներ:

«Ծրագրի շահառուները տնազուրկ կամ անբավարար բնակարանային պայմաններում ապրող, ցածր, սակայն կայուն եկամուտ ունեցող և կազմակերպության հետ համագործակցության պատրաստ ընտանիքներն են: Շահառուների ամսական ետվճարները մտնում են «Շրջանառու ֆոնդ» և օգտագործվում են նոր ընտանիքներին օգնելու համար»,-նշեց Ա. Եղիազարյանը: Մինչև այս տարվա մայիս ամիսը, ըստ ծրագրի տնօրենի, «Հայկական Հաբիթաթ»-ը «Habitat for Humanity» միջազգային կազմակերպության պաշտոնական գործընկերն էր: Բայց մայիսից հետո կազմակերպությունները սկսեցին միասին չաշխատել: Պատճառը, ինչպես նշեց տնօրենը` միջազգային կազմակերպության «գնաճի հաշվարկման» քաղաքականությունն էր: «Իրենց այդ քաղաքականությամբ պահանջում էին «Շրջանառու ֆոնդ»-ը տարեկան գնաճից պաշտպանելու նպատակով շահառուներից տոկոս գանձել տարեկան գնաճի չափով, իսկ 2007 թվին մեր Կենտրոնական բանկի հաշվարկների համաձայն գնաճը կազմել է 4.4%»,-ասաց նա և ավելացրեց, որ երկրի օրենսդրության համաձայն հասարակական կազմակերպություններն իրավունք չունեն տոկոս գանձել շահառուներից:

Դրանից հետո, «Habitat for Humanity» կազմակերպությունը «Հայկական Հաբիթաթից» պահանջել է ծրագիրն իրականացնել Հայաստանում գործող մեկ այլ վարկային կազմակերպության միջոցով, սակայն այդ տարբերակով շահառուներից գանձվող տոկոսադրույքը հասնելու էր 9-11%-ի, իսկ Ա. Եղիազարյանի հավաստմամբ, այդ ծրագիրն անմատչելի կլիներ ցածր եկամուտ ունեցող ընտանիքների համար: «Habitat for Humanity» կազմակերպությունը չի ընդունել այս փաստարկները, և այս տարվա մայիսին դադարեցրել է գործընկերությունը «Հայկական Հաբիթաթ» ԲՀԿ-ի հետ:

«Հայկական Հաբիթաթ» ԲՀԿ-ի աշխատակազմի և խորհրդի անդամները ստեղծել են նոր կազմակերպություն` «Ֆուլեր տնաշինության կենտրոն», որը պաշտոնական գործընկերության համաձայնագիր է ստորագրել ԱՄՆ-ում հիմնված Fuller Center for Housing, Inc. կազմակերպության հետ: Ա. Եղիազարյանի հավաստմամբ, բարեգործական ծրագրերում իրենց 2006 թվականից օգնել է նաև Մայր Աթոռ Սուրբ Էջմիածինը: «2006-07 թվականներին մենք համագործակցեցինք, իսկ «Habitat for Humanity» ընկերությունից բաժանվելուց հետո մեզ հստակ չեն ասում, թե համագործակցությունը շարունակվելու է, թե` ոչ: Միայն վերջերս Մայր Աթոռի ներկայացուցիչների հետ հանդիպման ժամանակ նրանք շնորհակալություն հայտնեցին մեր արած գործի համար ու խնդրեցին իրենց աջակցությամբ կառուցված տների մոտ ցուցանակներ տեղադրել, որտեղ նշվում է, որ դրանք կառուցվել կամ վերանորոգվել են եկեղեցու աջակցությամբ»,-ասաց կազմակերպության տնօրենը:

Panorama.am-ի թղթակցի հետ զրույցում Մայր Աթոռի դիվանապետի օգնական Տեր Պարույր Քահանա Ավետիսյանը նշեց, թե իրենք համագործակցել են «Հայկական Հաբիթաթ» ԲՀԿ-ի հետ ու հույս հայտնեց, որ համագործակցությունը կշարունակվի: Բացի այդ, նա հաստատեց, որ այն երբեք էլ չի դադարել: Սակայն «Հայկական Հաբիբաթ», այժմ` «Ֆուլեր տնաշինության կենտրոն»-ը, նշում է, որ ներկայում իրենց միջև համագործակցության առումով միայն «անորոշություն է տիրում»:

Նշենք, որ մայիսից` «Habitat for Humanity»-ից բաժանվելուց հետո, «Ֆուլեր տնաշինության կենտրոն»-ն արդեն սկսել է Հայաստանի 8 համայնքներում 25 կիսակառույց տների ավարտման ծրագիր: Ծրագրի սկզբունքները նույնն են` գումարը վերադարձնում են տասը տարվա ընթացքում զրո տոկոս տոկոսադրույքով: