Ձեր վստահելի աղբյուրը

Ջավախքի հասարակական կազմակերպությունները Վրաստանի համար միակ ճանապարհը համարում են ֆեդերալ պետության ձևավորումը: Այպես է նշված Սամցխե-Ջավախքի և Քվեմո Քարթլիի հայկական հասարակական կազմակերպությունների խորհուրդի տարածած հայտարարության մեջ, որտեղ, մասնավորապես նշված է, «Հիմա, երբ դադարել են ռազմական գործողությունները, և երկրում ռազմական ուժերի տեղաբաշխումը դանդաղորեն վերադառնում է օգոստոսի 6-ի ստատուս քվոյին, երբ հակամարտության կողմերը և միջազգային հանրությունը փորձում են ելքեր գտնել ստեղծված իրավիճակից և ճշտել երկրի տարածքային ամբողջականության և գերիշխանության վերականգնման ուղիները, ակնհայտ է, որ ազգամիջյան խնդիրները ռազմական ճանապարհով լուծելու փորձերից գլխավոր տուժողը խաղաղ բնակչությունն է: Մենք` Սամցխե-Ջավախքի և Քվեմո Քարթլիի հայ ազգաբնակչության հասարակական ներկայացուցիչներս` ելնելով մեր երկրում խաղաղության և կայունության` երկրի ապագայի նկատմամբ մեր մտահոգությունից, գտնում ենք:

ա. Վրաստանի տարածքային ամբողջականությունը և գերիշխանությունը վերականգնելու, որպես կայուն և ժողովրդավար զարգացման երաշխիք` առկա ազգամիջյան խնդիրները օբյեկտիվ, արդարացի և իրավականորեն լուծելու նպատակով Վրաստանի պետական կառուցվածքին հարկ է տալ դաշնային «ֆեդերալ կառուցաձև» բաղկացած տարածքային միավորներից և կենտրոնական իշխանությունից:
բ. Վրաստանի պետական դաշնային կառույցում կենտրոնական իշխանություններին վերապահել Վրաստանի Սահմանադրության հոդված 3-ի առաջին կետի ենթակետերով սահմանված բոլոր լիազորությունները:
գ. Տարածքային միավորների կազմում հիմք ընդունել Վրաստանի բաղկացուցիչ ազգությունների էթնիկական ինքնության պահպանման և զարգացման կարիքները:
դ. Սամցխե-Ջավախքը, իր ներկա սահմաններով և Քվեմո-Քարթլիի սահմանակից, առավելաբար հայաբնակ բնակավայրերով, վերածել Վրաստանի պետական դաշնային կառույցի ինքնավար սուբյեկտներից մեկի` ինքնակառավարման լայն իրավասություններով, ներառյալ բնակչության կողմից ազատ ընտրություններով ինքնակառավարման բոլոր մարմինների ընտրության իրավունքը և Սամցխե-Ջավախքում մշակույթի, կրթության, սոցիալ-տնտեսական քաղաքականության, հասարակական կարգի պահպանության, տեղական ինքնակառավարման և շրջակա միջավայրի պաշտպանության իրավասությունները:
ե. Պետության Սահմանադրությամբ երաշխավորել Սամցխե-Ջավախքի տարածքում հայերեն լեզվին պետության պաշտոնական լեզվին զուգահեռ տարածաշրջանային լեզվի կարգավիճակի տրամադրումը.
զ. Պետության Սահմանադրությամբ երաշխավորել Վրաստանի օրենսդիր, գործադիր և դատական կառույցներում Սամցխե-Ջավախքի ներկայությունը»:

Նշենք, որ հ/կ-ների ներկայացուցիչները կարծում են, որ ժամանակն է Վրաստանի քաղաքական վերնախավը մեկ անգամ ընդմիշտ գիտակցի, որ պետության կայացման ու հզորացման ճանապարհը պետական կառույցի վերոհիշյալ հիմունքներով ձևավորումն է, երկրի ամբողջականության հաստատման նպատակով պիտի արժանավույնս գնահատել պետության օրինապահ քաղաքացիներին, լսել նրանց մտահոգություններն ու արդարացի պահանջները, նրանց տալ առնվազն այնքան լիազորություններ, ինչքան խոստացվում է պետության դեմ զենք բարձրացրածներին ու երկրի եվրոատլանտյան կառույցներում ինտեգրումը նախ և առաջ ենթադրում է եվրոպական արժեքների ամբողջական յուրացում և կիրառում, եվրոպական կառույցների նկատմամբ ստանձնած բոլոր, այդ թվում նաև ազգային փոքրամասնությունների իրավունքների լիակատար պաշտպանության գծով պարտավորությունների ամբողջական և անհապաղ գործադրություն: