Ձեր վստահելի աղբյուրը

Շատ դպրոցականների համար այսօր տոն է` գիտության և դպրության տոն: Աշակերտներից շատերը սրտատրոփ սպասում են, թե երբ են մուտք գործելու իրենց վերանորոգոված դպրոցը, իսկ շատերն էլ ուղղակի մտածում են` «Էլի այդ հին ու քարուքանդ դպրոցը պետք է գնամ»:

Ուրախացողները մեծ երախտիքով են խոսում «Լինսի» հիմնադրամի ու մեծ բարերար, Հայաստանի Ազգային հերոս Քըրք Քըրքոյանի մասին, ով իր աջակցությամբ հնարավորություն է տալիս երեխաներին հաճախել բարեկարգված, ժամանակակից պահանջներին համապատասխան դպրոցներ:

«Լինսի հիմնադրամի դպրոցաշինություն ծրագրի շրջանակում իրականացվող հանրակրթական դպրոցների ուժեղացումը, վերակառուցումը, նոր մասնաշենքերի կառուցումը և համալրումը հայ մեծանանուն բարերար, Հայաստանի ազգային հերոս Քըրք Քըրքոյանի հերթական ազգանվեր նախաձեռնություններից մեկն է»,-Էրեբունի համայնքի Արմեն Հովհաննիսյանի անվան թիվ 194-րդ դպրոցի բակում երեխաներին շնորհավորելիս ու վերակառուցված դպրոցի բացմանն ասաց քաղաքապետ Երվանդ Զախարյանը:
Նրա խոսքով, վերջին մի քանի տարում ակնառու են դարձել դպրոցաշինության` ուսումնական շենքերի ու կառույցների, սպասարկման համակարգերի արմատական արդիականացման ուղղությամբ տարվող աշխատանքները: Ե. Զախարյանը վստահեցրեց, որ նախագահի նախաձեռնությամբ ու հանձնարարությամբ առաջիկա երկու տարում ամբողջովին ավարտվելու են մայրաքաղաքի բոլոր դպրոցների և մանկապարտեզների ջեռուցման համակարգով ապահովման և կենսական անհրաժեշտության բոլոր ենթակառուցվածքների, շենքի ու գույքի արմատական արդիականացման աննախադեպ ծավալուն ծրագիրը: Ավելացել է նաև պետության կողմից կապիտալ ներդրումները կրթության ոլորտում:

«Լինսի» հիմնադրամի միջոցներով հիմնովին վերակառուցվել ու ժամանակակից չափորոշիչներին համապատասխանեցվել են 5 հանրակրթական դպրոց, իսկ 48 դպրոց ու 13 մանկապարտեզ վերանորոգվում են պետբյուջեով տրամադրած 4 մլրդ 130 մլն դրամով: Այս ձմեռ 202 քաղաքային հանրակրթական դպրոցներից կջեռուցվի 157-ը: Եթե ներդրումներրի ծավալները 2006թ. եղել են 1 մլրդ 460 մլն դրմա, ապա այս տարի այն կազմել է 6 մլրդ 500 մլն դրամ: Ընդհանրապես վերջին տարիների ներդրումների ծավալը կրթական համակարգում կազմել է 17 մլրդ դրամ: «Այս տարվա աշխատանքներն իրենց ծավալներով գերազանցում են նախորդ տարիների ցուցանիշները»,-ընդգծեց քաղաքապետը:

Լինսի ծրագրերի իրականացման գրասենյակի տնօրեն Հրայր Սարգսյանն էլ նշեց, որ վերակառուցվող շենք-շինությունները լիովին համապատասխանում են ժամանակակից պահանջներին: Իսկ այն հարցին, թե դեռ ինչքան կշարունակվի Լինսի դպրոցաշինության ծրագիրը, նա ուղղակի պատասխանեց` «Այդ հարցին կարող է պատասխանել միայն մեծ բարերարը»:

Այսպես, այսօր իրենց քարուքանդ դպրոցներով մտահոգվող աշակերտները հույսով պետք է սպասեն` երբ կգա իրենց դպրոցի հերթը: