Ձեր վստահելի աղբյուրը

Ռուսական լրատվամիջոցները լուր են տարածել, թե Հայաստանի տարածքում` Թուրքիայի ու Վրաստանի սահմանին մոտ ռուս մասնագետները կռունկի նոր տեսակ են հայտնաբերել: Այս տեղեկատվությունը պարզելու համար Panorama.am-ը զրուցեց «Թռչունների պահպանության հայկական միություն» հասարակական կազմակերպության նախագահ Մամիկոն Ղասաբյանի հետ:

Նա հերքեց այդ լուրերը` կռունկի նոր տեսակը, այո` հայտնաբերված է, սակայն`ոչ ռուս մասնագետների կողմից:

«Անցյալ տարի Ռուսաստանում մենք մասնակցում էինք կռունկների մասին գիտական կոնֆերանսին, որտեղ մեր ռուս գործընկերները պարծեցան, թե իրենց մոտ կռունկների շատ տեսակներ կան: Ես էլ ասացի, որ մեզ մոտ էլ այդ թռչնի նոր տեսակ կա: Մինչ այդ մենք լրջորեն չէինք զբաղվում կռունկների ուսումնասիրությամբ, քանի որ դա ֆինանսական ներդրումներ էր պահանջում: Ռուս գործընկերները շատ հետաքրքրվեցին ու առաջարկեցին միասին հետազոտություն անցկացնել»,-պարզաբանեց Մ. Ղասաբյանը: Նրա խոսքով, այդ ուսումնասիրությունը կատարվել է միասնական ուժերով, հետևաբար տեղեկատվությունը, թե ռուս մասնագետներն են հայտնաբերել կռունկի նոր տեսակը` իրականությանը չի համապատասխանում: Ինչպես նշեց հասարակական կազմակերպության նախագահը, ինքն այդ տեղեկատվությունը կարդալուց հետո նա հեռախոսազրույց է ունեցել Ռուսաստանի իր գործընկերոջ հետ:

«Ես իրեն բացատրեցի, որ այդպես չի կարելի անել, դա ճիշտ չէ»,-ասաց Մ. Ղասաբյանը:

Ըստ նրա, կռունկի նոր տեսակը հայտաբերվել է Շիրակի մարզից հյուսիս-արևմուտք ընկած տարածքում` հայկական Ջավախքում: Սկզբնական շրջանում մասնագետները հայտնաբերել են երկու բույն, որոնցից մեկում մեկ ձու է եղել, իսկ մյուսում` երկու: Սա Մ. Ղասաբյանին թույլ է տվել մտածել, որ տեղանքում բնադրել են 2-6 զույգ կռունկ:

«Այն տարածքը, որտեղ հայտնաբերվել ենք թռչնի նոր տեսակը, կարևորագույն թռչնաբանական տարածք է համարվում: Հայաստանում նմանատիպ 18 տարածք կա, որտեղ տարվա բոլոր եղանակներին 3 հոգուց բաղկացած հսկիչների խմբեր են աշխատում»,-ավելացրեց նա:

Նշենք, որ «Թռչունների պահպանության հայկական միություն» հասարակական կազմակերպությունը հանրապետության տարբեր տարածքներում զբաղվում է թռչունների տեսակի ուսումնասիրությամբ ու թվի հաշվառմամբ:

Կռունկների նոր տեսակի պահպանության համար, հասարակական կազմակերպության նախագահի խոսքով, իրենք միայն կարող են տարածքը անձեռմխելի դարձնել, բայց արգելել, որ մարդիկ տվյալ տարածք մտնել չկարողանան` չեն կարող:

«Դա արդեն նախարարության իրավասության տակ է,»,- պարզաբանեց Մ. Ղասաբյանը: