Ձեր վստահելի աղբյուրը

Օրերս հրաժարական տվեց ՀՀ վճռաբեկ դատարանի նախագահ Հովհաննես Մանուկյանը, ինչը տարաբնույթ մեկնաբանությունների արժանացավ: Panorama.am-ին հաջողվեց մի քանի կարճ պարզաբանումներ ստանալ:

Panorama.am-Պարոն Մանուկյան, Ձեր հրաժարականից անմիջապես հետո լրատվամիջոցներում սկսեցին արծածվել տարբեր ասեկոսեներ. Հրաժարականը կապում էին ինչի հետ ասես` սկսած «մարտի մեկի» դեպքերից, ավարտած` դատական բարեփոխումների անարդյունավետության մասին զրույցներով:

Հ.ՄԱՆՈՒԿՅԱՆ -Հրաժարականի դիմումում ես ներկայացրել եմ պատճառը, այն է` ցանկություն ունեմ փոխել գործունեությանս ոլորտը: Հրաժարականի այլ պատճառաբանություն չկա: Բոլոր վարկածները, որոնք վերջին օրերին լրատվամիջոցներով արծածվել կամ շոշափվել են` ընդամենը ենթադրություններն են հրապարակումների հեղինակների: Եթե ես հրաժարականի որևէ այլ պատճառ ունենայի` անպայման հրապարակավ դրա մասին կասեի:

Panorama.am- Այնուամենայնիվ, հետընտրական քրեական գործընթացների և «մարտի մեկի» գործերի հետ են ոմանք փորձում կապել Ձեր հրաժարականը:

Հ.ՄԱՆՈՒԿՅԱՆ -Վճռաբեկ դատարանի նախագահը որևէ քրեական գործի վերաբերյալ ի պաշտոնե կարող է կարծիք հայտնել միայն, եթե այն գտնվում էր` իր վարույթում, այն էլ` միայն որոշման տեսքով: Ձեր կողմից հիշատակված գործերի ընթացքին, քննությանը ստորադաս դատական ատյաններում ես որևէ առնչություն չեմ ունեցել և չէի էլ կարող ունենալ: Այդ իսկ պատճառով` հրաժարականը չէր կարող կապված լինել որևէ քրեական գործի վարույթի հետ:

Նմանապես անհիմն են բոլոր այն պնդումները, թե իբր հրաժարականը կապված է այսպես կոչված «մարտիմեկյան» դեպքերի առիթով հարուցված գործերի` վճռաբեկ վարույթի հետ:

Panorama.am- Կար կարծիք, որ հրաժարականի հիմքում է դատաիրավական բարեփոխումների գործընթացի անբավարար տեմպերը:

Հ.ՄԱՆՈՒԿՅԱՆ - Անցած տարիներին իրականացված բարեփոխումները, դրական փոփոխություններով հանդերձ, բնականաբար ունեին նաև թերություններ և բացթողումներ: Չեմ բացառում նաև մեր թերացման որոշակի հնարավորությունը: Սակայն բարեփոխումները շարունակական գործընթաց են, անելիքները շատ են և ես Վճռաբեկ դատարանի նոր ղեկավարությանը ցանկանում եմ հաջողություններ` դրանց շարունակման գործում:

Panorama.am-  Շատ է խոսվում դատական համակարգի և իրավապահ մարմինների այլ կառույցների միջև առկա հակասությունների մասին: Որտե՞ղ է դրանց պատճառը:

Հ.ՄԱՆՈՒԿՅԱՆ -  Սովորաբար աշխատանքային տարաձայնությունները առանձին պետական կառույցների միջև մամուլը հակված է ներկայացնել որպես «հակասություններ», «միջգերատեսչական կոնֆլիկտներ», և այլն: Սակայն կա ընդամենը յուրաքանչյուր պետական մարմնի լիազորություններից բխող մոտեցումների տարբերություն, որոնք հանգուցալուծվում են օրենքով սահմանված մեխանիզմների միջոցով: Ի դեպ, երբեմն այդ տարաձայնությունները օգնում են նաև ճշմարտությունը հայտնաբերելու գործում: Այնպես որ` այստեղ ևս ես պրոբլեմ չեմ տեսնում:

Panorama.am- Իսկ ինչով եք զբաղվելու մոտակա մեկ-երկու ամիսը:

Հ.ՄԱՆՈՒԿՅԱՆ -  Ավելի շատ ժամանակ եմ հատկացնելու ընտանիքիս և խորացնելու եմ օտար լեզուների իմացությունս: