Ձեր վստահելի աղբյուրը

Հայաստանի բջջային կապի ոլորտում երրորդ օպերատորի մրցույթի նախավորակավորման փուլն անցած երեք ընկերություններն էլ լուրջ մրցակից են այսօր այդ շուկայում գործող երկու ընկերությունների ` «Վիվասելի» և «ԱրմենՏելի» համար:

Panorama.am-ի թղթակցի հետ զրույցում նման կարծիք հայտնեց Հայաստանի հանրային ծառայությունները կարգավորող հանձնաժողովի անդամ Սամվել Արաբաջյանը, նշելով, որ մրցույթի մասնակից երեք ընկերությունների՝ Orange, CEO Blackrock Communications и M$A Tele2 AB, գործունեության աշխարհագրությունը բավական լայն է:

«Ֆրանս տելեկոմ» ընկերությանը պատկանող Orange ընկերությունն ամբողջ աշխարհում ունի բջջային կապի 110 միլիոն բաժանորդ, ֆիքսված կապի 45 միլիոն բաժանորդ և մոտ 20 միլոն DSL բաժանորդ: Շվեդական «M$A Tele2 AB» ընկերությունը Ռուսաստանի 17 շրջաններում ունի 9,5 միլիոն բաժանորդ, իսկ անգլիական ու իռլանդական «CEO Blackrock Communications» ընկերությունը Իռլանդիայի առաջատար օպերատորն է:

Արաբաջյանի խոսքով, նախաորակավորման փուլի էությունը կայանում է նրանում, որ ոլորտում երրորդ օպերատորի համար լիցենզիան ստանա այն ընկերությունը, որը կարող է իրական մրցակցություն ապահովել և համապատասխանում է այն պայմաններին, որոնք պետությունը դրել է մրցույթի հիմքում:

Հանձնաժողովի ներկայացուցիչը հիշեցրեց, որ սկզբում մրցույթին մասնակցելու հայտ էին ներկայացրել 17 ընկերություններ, սակայն ծանոթանալով մրցույթի պայմաններին, այդ թիվը կրճատվեց, դառնալով 6, իսկ հիմա մնացել են միայն 3-ը:

«Մրցույթի ընթացքը ցույց է տվել, որ բջջային կապի հայկական շուկայի նկատմամբ հետաքրքրությունը մեծ է: Երեք ընկերությունները բավականին լուրջ են և կարող են լուրջ մրցակից դառնալ գործող օպերատորների համար», - ասել է Արաբաջյանն ու հավելել, որ նման լուրջ ընկերությունների հետաքրքրությունը խոսում է այն մասին, որ նրանց մասնագետները ուսումնասիրել ու գնահատել են շուկայի ծավալներն ու հնարավորությունները և համարել, որ կարող են շուկա մտնելով, ընդլայնել ու զարգացնել իրենց բիզնեսը:

«Եթե երրորդ օպերատորի համար տեղ կամ նման ծառայությունների պահանջարկ չլիներ, չէր լինի նման լուրջ մրցակցություն առաջատար ընկերությունների շրջանակում»,- ասել է հանձնաժողովի անդամը:

Անդրադառնալով այդ ընկերությունների կողմից նաև ֆիքսված կապի ծառայություններ մատուցելու հնարավորությանը, Արաբաջյանն ընդգծեց. «Չի բացառվում, որ մի գեղեցիկ օր նրանք ցանկություն կհայտնեն դառնալ նաև ֆիքսված մասով օպերատոր: Ես ավելի քան վստահ եմ, որ մինչև տարեվերջ առնվազն երկու ընկերություններ ինտերնետ ծառայություններ կմատուցեն Wimax տեխնոլոգիայով, իսկ հաջորդ տարվա սկզբից` ֆիքսված հեռախոսակապի ծառայություններ` անլար տեխնոլոգիայով: Հաջորդ տարվանից նմանատիպ ծառայությունների նկատմամբ առաջարկ ու պահանջարկ կձևավորվի ինչպես Երևանում, այնպես էլ մարզերում»: Թեև դրա համար արդեն հայտերը ներկայացվել են, սակայն Արաբաջյանը հրաժարվեց նշել դիմած ընկերությունների անունները:

Ամենամոտավոր հաշվարկներով, ֆիքսված կապի պահանջարկը կազմում է 1 միլիոն բաժանորդ, այսինքն պետք է գործի 1 միլիոն բաժանորդային գիծ:

Միաժամանակ, երկրում այսօր գործում է ընդամենը 600 հազար գիծ: «Դա նշանակում է, որ մոտավորապես 2 անգամ կարելի է մեծացնել այդ շուկան, քանի որ պահանջարկի մոտ 50 տոկոսը բավարարված չէ»,- ասաց նա, հավելելով, որ ենթակառուցվածքները պետք է նորից ստեղծել, քանի որ այսօրվա տեխնոլոգիաները զգալիորեն տարբերվում են նախկիններից:

«Կարելի է օգտագործել նաև այն գծերը, որոնք կիրառում է տվյալ շուկայում գերիշխող դիրք ունեցող ընկերությունը: Կան նաև տեխնոլոգիաներ, որոնք թույլ են տալիս ցանց կառուցել շատ արագ ու էժան»,- իր խոսքն ամփոփեց Արաբաջյանը: