Ձեր վստահելի աղբյուրը

Դեռևս հունիսին կառավարությունը հաստատեց աշխարհի առաջատար բուհերում սովորող ՀՀ քաղաքացիներին և սփյուռքահայ ուսանողներին օժանդակելու ծրագրի ընդհանուր հայեցակարգը, որն այս օրերին արդեն գտնվում է կառավարության քննարկման փուլում։

Ներկայացված հայեցակարգը անցել է մի քանի փորձաքննություն, քննարկվել է անգամ ֆորումներում:

Ծրագրի նախաձեռնողներից և համահեղինակ ՀՀ գիտությունների ազգային ակադեմիայի թղթակից անդամ, ֆիզիկա-մաթեմատիկական գիտությունների դոկտոր Արթուր Իշխանյանը Panorama.am-ի հետ զրույցում նշեց, որ նախկինում իր հեղինակած հայեցակարգը ներառել է առավելապես ուսանողական կրթաթոշակների տրամադրման անհրաժեշտությունը և մեխանիզմները:

Արթուր Իշխանյանը նշեց, որ ներկա կրթական հայեցակարգում անփոփոխ տեղ են գտել նախորդ ամիսների քննարկումների ընթացքում մշակված և խմբագրված դրույթները, բայց նաև բազմաթիվ նոր ենթակետեր են ավելացել:

«Կառավարությունից առաջարկեցին մտածել և գրել կամ ավելացել մի հատված, որը վերաբերի ավագ դպրոցի աշակերտների հետ տարվող աշխատանքներին։ Նրանց համար պիտի պայմաններ ստեղծենք և օժանդակենք, որ նրանք ընդունվեն աշխարհի առաջատար բուհերը, քանի որ նրանք Հայաստանի ապագա սերունդն են:

Մասնավորապես, ծրագիրը նախատեսում է լուրջ աշխատանք` միջազգային օլիմպիադաներում լավ ու պատրաստված հանդես գալու համար»,-ասաց նա:

Արթուր Իշխանյանը նշեց, որ ծրագրում հաշվի են առել նաև կրթական այս գործընթացում կոռուպցիոն ռիսկերի հնարավորինս նվազեցման միտում, ուստի դպրոցականների ընտրությունը կկատարվի միջազգային թեստերի հիման վրա:

Արթուր Իշխանյանը Panorama.am-ի հետ զրույցում նշեց, որ, որպես համահեղինակ, ինքն առանձնացնում է մի քանի կարևոր բաղադրիչներ ու գործառույթներ, և այդ համատեքստում կարևորում է հետբուհական ժամանակաշրջանը։

«Նոր տեխնոլոգիաներ ունենալու դեպքում մեզ հարկավոր են բարձրակարգ մասնագետներ: Իրավական դաշտը առայժմ կատարյալ չէ և խոչընդոտում է աշխարհի առաջատար բուհերում որակյալ կրթություն ստանալուն: Այս հայեցակարգը կարգավորում է իրավական դաշտը: Մասնավորապես, այն կվերացվի հանրապետությունից ելքի թույլտվություն տալու պայմանավորումը` պարտադիր զինվորական ծառայությունից տարկետում ձևակերպված լինելու հետ:

Այս կետի վերաբերյալ իմ ձեռքի տակ են գլխավոր կոմիսարի ստորագրած և ՊՆ իրավաբանական վարչության տեղեկանքները, որտեղ նշվում է, որ ներկա օրենսդրության կիրառումը հաճախ հանգեցնում է ուսանողների հեռացմանը, կամ երբեմն` դուրս մնալուն և արտերկրում անօրինական բնակություն հաստատելուն»,-նշեց պարոն Իշխանյանը:

Որակյալ կրթություն ստացողները կընտրվեն մրցութային կարգով, բայց մի նախապայմանով` կրթաթոշակի «տերերը» պետք է յուրաքանչյուր տարի 1-ից 2 անգամ մոտ մեկ ամիս տևողությամբ այցելեն հայրենիք, մասնակցեն հայոց լեզվի, պատմության և մշակույթի ինտենսիվ դասընթացներին, նաև՝ լսեն բազմաթիվ վերլուծական-քննադատական դասախոսություններ հանրապետության տարբեր գերատեսչություններում:

«Սա կնպաստի երիտասարդների հետկրթական կարիերայի զարգացմանը։ Փորձարարական ոլորտում պահանջվում են թանկարժեք լաբորատորիաներ, իսկ Հայաստանում դրանք չկան: Ուսանելով աշխարհի առաջատար բուհերում մեր շրջանավարտները կգան Հայաստան և կսկսեն աշխատել նոր ժամանակի պահանջով, ինչ կխթանի նաև որակի զարգացմանը», -ասաց Արթուր Իշխանյանը և նշեց, որ երիտասարդներին կրթաթոշակներ տրամադրման համար կստեղծվի նաև պետական հովանավորությամբ հիմնադրամ։

Արթուր Իշխանյանը նշեց, թե մասնագիտությունների սահմանափակում չի տրվելու, կարող են դիմել բոլորը, իսկ ակնկալվող ներուժն ու գիտելիքը ծառայելու է Հայաստանի և սփյուռքի հիմնախնդիրների լուծմանը: